100 vjetori i lëvizjes artistike Dada po festohet edhe në Tiranë, me aktivitete të shumta kulturore.
“Bëhu DADA për 5 ditë – ndiq veprimtaritë dadaEAST- dadaDAYS”, është logoja e festivalit të letërsisë dhe performancës që po organizon (26-30 shtator) shoqata kulturore “Poeteka” te instalacioni “Reja” i japonezit Fujimoto, në Galerinë Kombëtare të Arteve, transmeton ATSH.
Në natën e parë të këtij festivali ishte i ftuar artisti izraelit, Dror Liberman, me performancën “Diçka lëviz midis mustaqeve dhe kapelës”. Festivali i Letërsisë dhe Performancës, titulluar “DadaEast/Dada-Days” synon të prezantojë një koncept të bashkuar të një Europe, e cila në perspektivë artistike shfaqet pa kufizime dhe pa kufij kulturorë, ku të gjitha vendet kontribuojnë bashkë.
Manifestimi i Dadaizmit, rrymë letrare e artistike që mbush 100-vjetorin, sipas drejtorit të Festivalit, Arjan Leka vjen me një synim të caktuar në terrenin e munguar të letërsisë shqipe
Performancat e artistëve kanë rikthyer në kujtesën e publikut poezitë dhe poetët që shpërthyen në një mënyrë të veçantë një shekull më parë kundër formave tradicionale të letërsisë.
Disa autorë që e përfaqësojnë dadaizmin si Apollinier, Aragoni e më gjerë janë bërë pas rënies së komunizmit të njohur dhe të dashur nga lexuesit shqiptarë.
Të ftuar përgjatë gjithë ditëve të organizimit të këtij festivali janë artistë nga Austria, Bosnje Hercegovina, Gjermania, Franca, Rumania, Zvicra, Mali i Zi, Holanda, Serbia, Sllovenia, Kroacia, Bullgaria, Maqedonia, Kosova, Italia, Greqia, si Jani Osëald, Ervina Halili, Zvonko Karanović, Demosteni Agrafiotis, Željko Barišić, Franko Bušić, Zunaza Finger-përkthyese nga gjuha shqipe edhe gjuhët sllave në gjermanisht, Patrick Dubost autor i tridhjetë librave dhe dy albumeve, Dorian Steinhoff, performues i poezisë slam, libri i të cilit “Drita e flakës në fytyrat tona” do të vijë në shqip në ditët e festivalit nën logon e botime “Poeteka” përkthyer nga Sokol Mici.
100 vite më parë në Zyrih, një grup artisësh që emigruan për shkak të Luftës së Parë Botërore, u mblodhën në një klub, që e quajtën “Cabaret Voltaire”.
Nga aty bënë thirrje për veprime revolucionare, që do të shembnin kufijtë që ndanin jetën nga arti. Ata e quajtën këtë lëvizje “DADA”, si një grupim i ri hipermodern, internacional dhe provokativ. (b.an)
