Presidenti Federal gjerman Frank-Walter Steinmeier deklaroi sot se ishte ofruar që të vizitonte Kievin së bashku me liderët e vendeve baltike, por kjo gjë nuk ishte e dëshiruar nga Ukraina.
Steinmeier tha se presidenti polak Andrzej Duda u sugjeroi liderëve të vendeve baltike të Lituanisë, Letonisë dhe Estonisë për të “dërguar një sinjal të fortë të solidaritetit të përbashkët me Ukrainën”.
“Isha gati për të. Por me sa duket, kjo nuk ishte ajo që kërkohej në Kiev”, u tha Steinmeier gazetarëve gjatë vizitës në Varshavë.
Presidenti gjerman konsiderohet të ketë pasur marrëdhënie të ngushta me Rusinë në rolet e tij të mëparshme politike. Ukraina ka qenë më parë kritike ndaj Steinmeier për lidhjet e tij me Rusinë dhe rolin kryesor që ai luajti si ish-ministër i Jashtëm në përmirësimin e marrëdhënieve me udhëheqësin rus Vladimir Putin.
Komentet e presidentit gjerman vijnë pasi liderë të tjerë evropianë kanë bërë vizita në Kiev. Kryeministri i Britanisë Boris Johnson dhe kancelari i Austrisë Karl Nehammer bënë vizita të veçanta të shtunën, duke u takuar me presidentin ukrainas, Volodymyr Zelensky.
/b.h
