“Basha është ministri i 20-të i Ramës”. Kështu është shprehu deputeti Flamur Noka, i cili në një reagim për media theksoi se në tetë vite demokratët janë lënë në harresë.
Noka theksoi se Basha është ministër në kabinetin qeveritar dhe ka një mandat për shuarjen e opozitës.
“Që Basha kishte flirt apo marrëveshje ka pasur thashetheme dhe akuza prej kohësh, që në 2017,sigurisht ne që kemi qenë brenda PD kemi hezituar t’i pranojmë këto gjëra. Mirëpo fillim shtatori i këtij viti hapi kutinë e pandorës. Vendimi i Bashës detyroi që të hapen çështjen.
Të marrësh një vendim për të asgjësuar forcën tënde politike dhe për ta kthyer në një shoqatë Basha-Bardhi, do të thotë që ti ose je peng, ose ti nuk je normal. Kjo e dyta nuk është e vërtetë sepse Basha është një politikan mëse normal. Pse atëherë duhet të marrësh një vendim me të cilin ti asgjëson forcën tënde politike.
Një politikan po të mos ishte peng, po t’i dhimbseshin ata demokratë që kanë sakrifikuar për ta bërë prej 8 vitesh kryeministrin, në rastin më të mirë kur ndodhesh para një vendimi të tillë duhet të jepte dorëheqjen, jo vendime për të asgjësuar forcën politike.
Nëse qeveria Rama ka 19 ministra, Basha është ministri i 20 që ka një mandat ministri i shuarjes së opozitës”, tha Noka./m.j
