Mesa duket Partia Demokratike nuk do të tërhiqet kollaj nga testi i drogës. PD ka depozituar në kuvend dy amendamente për draftin e dekriminalizimit. Dy nenet që PD kërkon të shtojë kanë të bëjnë me ndalimin e të zgjedhurve që përdorin lëndë narkotike. Njëri ka të bëjë me “përdorimin e substancave narkotike” ndërsa tjetri me “trajtimin e funksionarëve publikë”. Sipas neneve që PD kërkon të shtojë në draftin e dekriminalizimit, testi i drogës për zyrtarët duhet bërë përpara betimit të tyre në pozicionin që do marin.
“Përdorimi i substancave narkotike përbën kusht pengues për të mbajtur, për tu zgjedhur apo për të emëruar në një nga funksionet publike të përcaktuara në nenin 2 dhe 3 të këtij ligji”, thuhet në një prej propozimeve të demokratëve.
Pak ditrë më parë, në komisionin e posaçëm për dekriminalizimin u arrit akordi mes dy partive kryesore të vendit, për t’i dhënë “OK” vijimit të procesit të dekriminalizimit. Madje, në daljen publike, deputeti socialist Taulant Balla dhe ai demokrat Oerd Bylykbashi duke i dhënë dorën njëri tjetrit, bënë dhe shaka mes tyre, kur Balla u tha gazetarëve se do t’i shohin më shpesh bashkë politikanët.
