Kandidati për kreun e PD, Eduart Selami tregoi në #DritaremeRudinën në Vizion Plus, se pasi të zgjidhet kryetar i PD, nuk do të merret vetëm me strukturën e brendshme të kësaj partie, por edhe me partinë qeverisëse.
Selami tha se do të analizojë programin e para 4 vjetëve, për të parë se ku i ka Rama vendet e punës.
“Do t’i bëj një nder Ramës. Do t’i marr listën e parë, pasi këtë radhë nuk kishte listë, doli vetëm me tuta dhe faleminderit se kemi parë edhe më keq.
Do t’i marr listën e para 4 vjetëve dhe do ta bëj 8 vjet dhe do ta mbaj aty, për të parë se çfarë ka premtuar. Do të shoh se ku i ka 300 mijë vende pune dhe do të ngre disa departamente siç i ka partia gjermane, ku do të marr njerëzit më të aftë nga Shqipëria dhe jashtë. Do ta bëj një laborator të zhvillimit politik bashkëkohor”, tha Selami.
