Sonte në Zulalandin e Mustafa Nanos ishte ftuar kryetari i Komisionit të Ekonomisë Erjon Braçe, i cili fillimisht foli rreth Reformës në Drejtësi. Ai deklaroi se PD-ja nuk e do reformën, por edhe brenda mazhorancës ka deputetë që kërkojnë dështimin e reformës edhe pse nuk shprehen publikisht.
Ndërkohë Braçe befason kur thotë se do të largohet nga politika e parlamenti nëse do të vijohet me lojën pa rregulla. “Në qoftëse nuk ka rregulla në PS do të largohem…nuk konkurroj dot me njerëz që kanë para” shprehet Braçe. Duke u ndalur tek zhvillimet në parlament ai kritikoi gjuhën e përdorur nga deputetët të cilët nuk respektojnë parimet dhe nuk zgjidhin hallet e popullit por kanë si synim denigrimin e imazhit të tjetrit.
Braçe ndalet gjithashtu edhe te letra e deputetit Vladimir Kosta, ku ky i fundit u shpreh se ka shpenzuar para për zgjedhjet e vitit 2009 në Berat. Braçe përgënjeshtron deklaratën duke theksuar se “beteja në Berat në vitit 2009 e kam drejtuar vetë, kemi fituar me ndershmëri dhe jo përmes parave”. Ndërkohë që për letrën e Kostës, Braçe thotë se “pasazhi i parave ishte pasazhi më i neveritshëm në atë letër”. Ai tha se “gjërat që thotë Kosta janë të rënda, por ai është i prirur të mos i besojë; po të ishin të vërteta ato gjëra, ai do t’i kish shprehur në mbledhjen e grupit parlamentar. Por nuk e ka bërë kurrë këtë.”
I pyetur nga gazetari Nano nëse ka deputetë të mazhorancës që duan që kjo reformë të mos miratohet, Braçe tha se “po është një numër i madh deputetësh që nuk e duan por kanë frikë të dalin publikisht ta thonë këtë gjë, pasi do sulmoheshin nga të gjithë”./tema/a.k
