7 ndeshje, 7 fitore. Juventus vazhdon nisjen perfekte të sezonit të ri të Serie A, duke mposhtur skuadrën ndjekëse në renditje, Napolin 3-1. Edhe pse nuk shënoi Ronaldo ishte protagonist në të tre golat e realizuar nga Mandukic (2) dhe Bonucci.
Napoli e nisi me një marsh më shumë takimin dhe që në minutën e gjashtë Zielinski rrezikoi me një gjuajtje shumë të fortë por që përfundoi jashtë. Katër minuta më vonë Mertens kaloi miqtë në avantazh. Një gabim i Bonuccit në mbrojtje nxori të lirë në krah të djathtë Jose Callejon, ky i fundit pasoi për belgun që me portën bosh vetëm sa e shtyu topin në rrjetë.
Por bardhezinjtë do të barazonin shumë shpejt, kur në të 26’ Mario Mandzukic shënoi bukur me kokë pas një krosimi të saktë nga Ronaldo, i cili shmangu mjeshtërisht Hysajn në krah. Portugezi provoi të shënonte vetë dy minuta më vonë me një goditje dënimi në hyrje të zonës por Ospina ishte aty për të ndaluar topin. Napoli pati një mundësi të mirë për t’u rikthyer në epërsi dy minuta para fundit të pjesës së parë kur Mario Rui goditi mbi traversë edhe pse mund të bënte shumë më mirë.
Pjesa e dytë nisi direkt në “malore” për Napolin; pas vetëm katër minutash Mandukic shënoi golin e dytë për Juventusin, përsëri i ndihmuar nga Ronaldo. Porgugezi u fut në qendër nga e majta dhe goditi fort në kuadrat, duke detyruar Ospinën të bënte një grushtim të vështirë. Topi mbeti në në zonë dhe sulmuesi kroat mbërriti më shpejt nga të gjithë për ta shtyrë në rrjetë.
Gjërat u vështirësuan edhe më shumë për skuadrën e Carlo Ancelottit kur Mario Rui mori kartonin e dytë të vërdhë dhe la të tijët me dhjetë vetë. Prapavija napoletane vuajti sulmet e Juventusit pasi vetëm Albiol i shpëtoi ndëshkimit, me Ruin, Hysajn e Koulibalyn të gjithë të ndëshkuar.
Juventusi shfrytëzoi më së miri superioritetin numerik duke shënuar edhe golin e tretë në të 76’ me Leonardo Bonuccin që shleu gabimin në golin e pësuar duke shtyrë në rrjetë një goditje me kokë të Ronaldos.
Në të 83’ Ronaldo iu afrua edhe vetë golit, me Mandukic që u përpoq t’i kthende “nderin” me një asist, por gjuajtja e portugezit përfundoi disa centimetra larg shtyllës së majtë.
Fitorja e shkëput Juven në krye me 21 pikë, 6 pikë më shumë se sa Napoli. E nëse Sassuolo arrin të fitojë nesër kundër Milanit, atëherë napoletanët zbresin në vend të tretë në renditje.
