Juventusi ka bërë një hap të madh për transferimin e sulmuesit brazilian, Gabriel Barbosa nga Santos.
Juventusi nuk ka të ndalur këtë verë. Klubi brazilian, Santos ka konfirmuar se ka pranuar ofertën prej 20 milionë euro nga Juventusi për sulmuesin e saj Gabriel Barbosa.
“Ne kemi dërguar një letër Ribeiro Wagnerit (agjentit të lojtarit), Valdemir dhe Lindalva (prindërve të lojtarit) me kushtet e kontratës. Santosi tani është duke pritur, nëse ata mendojnë se kjo është interesante atëherë do të vazhdojmë me hapin tjetër, që është edhe njoftimi i Barcelonës”, ka thënë presidenti i klubit të Santosit, Modesto Roma për Globo Esporte.
Raportohet se Barcelona do të ishte e gatshme të paguajë shumën që ka ofruar Juve, por që negociatat për të nënshkruar me brazilianin do të sillnin komplikime të tjera për shkak të regjistrimit.
Raportohet se Santosi ka në pronësi 40 për qind të kartonit të lojtarit, përderisa lojtari posedon 40 të tjerat, kurse pjesën tjetër e posedon grupi financiar Doyen Sports.
Deri më tani Juventusi ka transferuar këta yje: Dani Alvesin, Miralem Pjanicin, Mehdi Benatian, Marko Pjacan dhe është afër transferimit të Gonzalo Higuainit. /a.m.
