EKSKLUZIVE/ Afera “Panama Papers” duket se ka edhe ndërlikimet e veta ligjore për t’u ndjekur dhe hetuar nga organet e drejtësisë shqiptare. Përveç problematikës së boshllëqeve ligjore në legjislacionin shqiptar, të cilat u bënë prezente sot edhe nga ministri i Drejtësisë, Ylli Manjani, hetimi i kësaj çështje lidhet dhe me nivelin e informacionit që mund të kenë organet e drejtësisë shqiptare. Konstitucionalisti, Sokol Hazizaj, në një prononcim për Javanews përshkuan dy momentet ku organi i Prokurorisë mund të nisë procedimin penal ndaj personave apo subjekteve të përfshira në aferën “Panama Papers”. Sipas tij, së pari Prokuroria duhet të sqarojë se sa të dhëna ka për veprën penale të pastrimit të produkteve të veprave penale ose të pastrimit të parave nga subjekte apo shoqëri shqiptare.
“Së dyti, duhet sqaruar fakti nëse ka ardhur ndonjë letër porosi nga autoritetet e huaja për fillimin e procedimit penal ndaj ndonjë personi apo subjekti juridik”, deklaron Hazizaj.
Sipas tij, nëse egziston një nga këto momente proceduriale, atëhere mund të thuhet se ka seriozisht fillim të procedimit penal nga Prokuroria. Por në mungesë të këtyre dy momenteve, nënvizon Hazizaj, nuk ka dhe nuk mund të ketë procedim penal.
(javanews.al) Me. Ar
