Juristët paralajmërojnë se shumë shpejt do të ketë arrestime VIP, ndërsa politikanët po bëjnë lëvizjet e fundit për të fshehur provat. Avokati Genc Gjokutaj, në një prononcim për gazetën “Sot”, u shpreh se prokuroria i ka të gjitha provat e mjaftueshme për të realizuar arrestimet VIP.
“Edhe mund të ketë arrestime VIP. Besoj që kjo prokurori i ka provat tullë për të vepruar. Nuk është problemi vetëm te arrestimet.
Reforma në drejtësi është bërë për të respektuar njerëzit. Këtu ke gjykata që po mbajnë njerëz pa vendim në burg, është shkelje flagrante.
Janë mbushur burgjet dhe gjykatat kanë frikë t’i nxjerrin nga burgu. Sepse po t’i nxjerrësh nga burgu, quhesh i korruptuar”, u shpreh Gjokutaj.
Ai është ndalur dhe te ngërçi i krijuar ditë e fundit për zbatimin e ndryshimeve kushtetuese nga Presidenti Bujar Nishani. Gjokutaj ka thënë se gjithçka do arrijë të zgjidhet.
“Ka përplasje sigurisht. Opozita ka përplasje për shumë pika jo vetëm për ligjin e vetingun, por dhe për SPAK, etj. Pra, kontestohen elementë teknikë. Këto përplasje do kalojnë. Sepse nuk ka kuptim të miratosh reformën dhe mos të kalosh ligje kryesore të saj.
Për ligjin kryesor të reformës është bërë një debat, janë zgjidhur disa ngërçe mes pozitës dhe opozitës; kështu që nuk do jetë fondamentale kontradikta në ligjet e posaçme. Në elementët teknikë ka gjithmonë opinione të ndryshme”, tha Gjokutaj.
Ndërsa avokati Idajet Beqiri deklaroi se politikanët po përpiqen të sajojë prova për të justifikuar miliardat derisa reforma në drejtësi të nisë të zbatohet.
“Këta tashmë janë vetëzbuluar dhe “Mbretëresha e provës” janë hezitimi i tyre për t’u bërë kjo reformë, teoritë dhe pengesat e tyre për ta futur në kalendat greke miratimin dhe vënien në zbatim të kësaj reforme të thellë.
Qëllimi i tyre është të fitojnë kohë për të gjetur e sajuar “prova” për të justifikuar miliardat që kanë në bankat e huaja dhe të vendit, apo pasuritë përrallore të paluajtshme që kanë brenda dhe jashtë vendit, e që nuk mund të bëheshin kurrë me pagën e shtetit që ata kanë marrë.
Tashmë kjo klasë politike e degjeneruar nga çdo pikëpamje, ka mbetur zbuluar, dhe është e bindur se nuk i ka më në dorë mbulimin e krimit me fodullëk, me blerje prokurorësh, gjyqtarësh e bankierësh, me nxitje të luftës civile, etj”, tha Beqiri.
Ai u shpreh se ora e ndëshkimit për Berishën, Bashën dhe Nishanin po afron. “Pandëshkueshmëria i ka ditët e numëruara në këtë vend.
Po e provojnë mbi kurrizin e tyre prokurorë e gjykatës të cilët janë të arrestuar në burgje, do e provojnë edhe këta “cuba” që ende bëjnë “të fortin” ngaqë nuk duan të japin veten se janë në buzë të humnerës, si Berisha, Basha, Meta, Nishani, familjet e tyre dhe një listë aq shumë e gjatë që pason.
Sa nesër do të çuditet bota për këtë statistikë kaq skandaloze me politikanë kriminelë, në raport me një popullsi në vend prej më pak se 4 milionë banorë”, tha Beqiri.
