Juri Kim iu tha mos hani bar, jo hani bar!

Nga Indrit Vokshi

Juri Kim doli në pension 53 vjeçe. Departamenti i Shtetit e quan largimin e Kim si tranzicion normal drejt pensionit. Mirëpo ky shpjegim nuk mjafton, veçanërisht për shqiptarët të cilët e damkosën Juri Kim si shkatërruese të demokracisë në Shqipëri, duke nënkuptuar se para ardhjes së Kim, Shqipëria gëzonte prej demokracisë.

Sipas mitologjisë (eskatologjisë) shqiptare, Juri Kim na kishte një çështje personale: luftën me Sali Berishën. Ajo vepronte në emrin e saj personal ose George Soros, jo në emër të qeverisë amerikane. Ishte pra një luftë mes dy fiseve, fisit Kim dhe fisit Berisha. Na u shpjegua njëlloj siç nderuari Artan Hoxha na shpjegon konfliktet midis familjeve e fiseve të forta shqiptare.

Juri Kim e cila u trajtua si lajmëtare e George Soros në realitet u emërua ambasadore në Shqipëri dhe u pranua nga Senati i ShBA me datë 29 nëntor të vitit 2019, vit kur në pushtet ishte Donald Trump dhe Sekretar i Shtetit ishte republikani Mike Pompeo. Nuk e emëroi as Sorosi, as Blinkeni, as Bideni; meqenëse duan ta shohin si partiake.

Mirëpo në Shqipëri duhej paraqitur patjetër sikur e emëroi Sorosi. Edhe pse nuk gjejnë dot asnjë lidhje të saj me Soros, nuk na sjellin asnjë dokument apo ngjarje ku të vërtetohet se ajo veproi personalisht ose e urdhëruar nga George Soros, nuk ka rëndësi e vërteta, ka rëndësi çfarë ne duam si të vërtetë.

Me 29 nëntor 2019 kur Juri Kim u miratua ambasadore në Shqipëri, PD kishte 8 muaj që i kishte djegur mandatet dhe kishte hyrë në spiralen e revolucionit. Në vitin 2019 në pushtet në Amerikë ishin Donald Trump e Mike Pompeo. Sanksionimi nongrata i Sali Berishës kishte nisur qysh në vitin 2017-2018 gjatë presidencës Trump, pa ardhur ende Juri Kim në Shqipëri e pa ekzistuar askund emri i saj.

Juri Kim erdhi me porosi se Berisha është nongrata dhe ajo është e vetmja ambasadore amerikane në 30 vjet e cila nuk i ka shkuar Sali Berishës në zyrë. E vetmja. Pikërisht sepse ka qenë e udhëzuar nga qeveria e saj (qeveria Trump) që të mos takonte persona nongrata nga ShBA.

Juri Kim u tregua brutale sepse qeveria e ShBA ishte brutale. Kim deklaroi se do të ndjente keqardhje nëse një parti politike (imiton vullnetarët e Enverit) dhe deklaron se “bar do të hamë dhe udhëheqësin nuk e tradhëtojmë”.

Juri Kim nuk iu tha hani bar, përkundrazi, iu tha mos hani bar për shkak të një udhëheqësi. Demokratët berishistë u sollën si të prekur në sedër, thanë u bë kjo të na thotë neve do të hani bar, kur në fakt ajo iu tha mos shkoni në pikën ku i çoi Enveri militantët e tij, të izoluar nga bota, të pashpresë, vetëm sepse thonin “bar do të hamë e parimet nuk i shkelim” (parimi themelor ishte besnikëria e verbër ndaj udhëheqësit).

Sot demokratët po e hanë barin që përmendi Juri Kim dhe po e hanë edhe nën presidencën Trump dhe pa sekretarin Blinken por me sekretarin republikan Rubio. As Marco Rubio i Trump nuk po ua heq nongratan dhe asnjë zyrtar i Ambasadës Amerikane në Tiranë tashmë nën drejtimin e Trump-Rubio nuk po e takon apo mbështet Sali Berishën.

Po e hanë barin por nuk duan tua përmendësh e tua kujtosh barin sepse iu cënohen krenaria dhe sovraniteti. Mbi të gjitha iu shembet botëkuptimi dhe mënyra se si e shohin botën. Ata janë bindur se gjithçka vjen prej George Soros dhe po tiu kujtosh se edhe me Trump-Rubio në pushtet nongrata nuk po iu hiqet, nuk po takohen nga asnjë amerikan dhe do të jenë edhe më tej nën izolim, ata nervozohen keq dhe të akuzojnë si të shitur dhe shërbëtor të Sorosit. Nuk është e lehtë ta pranojnë një shpjegim tjetër mbi botën dhe mbi ngjarjet, nuk munden të pranojnë një shpjegim përtej Sorosit.

Fundja të njejtët njerëz që sot besojnë se gjithçka e bëri Juri Kim dhe jo qeveria e ShBA, besojnë se 1997-ën e bëri Mariza Lino me kokën e saj dhe jo qeveria e Bill Clinton. Ambasadorët amerikanë veprokan me kokën e tyre dhe jo sipas udhëzimeve të qeverisë së ShBA.

Prandaj edhe gëzimi për daljen në pension të Juri Kim paraqitet si fitore edhe pse nongrata vazhdon mbetet aty edhe nën presidencën e Donald Trump, duke na vërtetuar se asgjë nuk u bë me kokën e Juri Kim e për interesa personale të Juri Kim por u bë me vendim të qeverive amerikane.