Nga Eduard Zaloshnja
Gjatë sezonit veror, lajmet e çdo fundjave njoftojnë për radhë kilometrike në segmentin rrugor jugperëndimor: Vlorë-Orikum-Palasë-Himarë-Sarandë. Dhe çdo të hënë, diskutohet nëpër kafene për udhëtimet në plazhet jugperëndore, si destinacion kryesor i turizmit vendas përgjatë sezonit veror.
Por në vitet e fundit, me kalimin e verës, lajmet e çdo fundjave njoftojnë për radhë kilometrike në segmentin rrugor juglindor: Elbasan-Lin-Pogradec-Korçë. Hotelet dhe bujtinat në zonën nga Lini deri në Voskopojë mbushen plot gjatë fundjavave jo-verore. Dhe me fillimin e projekteve të “Lungogjolit” (nga Pogradeci në Tushemisht) dhe të pistave të skive në Dardhë e Voskopojë, pritet që trafiku drejt Juglindjes të rëndohet edhe më tepër në vitet në vijim.
Po ama, infrastuktura aktuale rrugore nuk mund t’i përgjigjet dot fluksit në rritje drejt Juglindjes – sidomos segmenti Bradashesh-Elbasan. Në udhëtimin tim të fundit drejt Juglindjes mu desh 1 orë ta kaloja këtë segment (që vite më parë përshkohej brenda 10 minutash…).
Fillimi sa më i shpejtë i punimeve për bypass-in e Elbasanit (që anashkalon segmentin tejet të rënduar aktualisht Bradashesh-Elbasan), do t’i jepte frymëmarrje turizmit vendor në gjithë zonën juglindore. Ndërsa për rritjen e turizmit të huaj drejt kësaj zone, duhet menduar për lidhje më moderne rrugore mes Ohrit/Manatstirit me Pogradecin/Korçën.
