Joe Biden, kandidim për hir të kujtimit të djalit të vdekur?!
Duhet të jenë ditë të vështira për zv.presidentin amerikan Joe Biden. Ai ndodhet përballë një vendimi që mund t’i ndryshojë jetën e tij, por edhe atë të miliona amerikanëve. Të kandidojë ose jo për Presidencën e vitit të ardhshëm? Njëra nga zgjedhjet është ajo e sfidës ndaj Hillari Klintonit kurse tjetra, ajo e qëndrimit pranë gruas Jill, sidomos pas vdekjes së djalit të tyre Beau, që vdiq në 30 maj të këtjij viti.
Sipas lajmeve që vijnë nga Uashingtoni, në fakt vdekja e Beau, që përflitej si ylli i ardhshëm i politikës amerikane, mund të jetë një shtysë për babain Joe, që të provojë të fitojë në emër të kujtimit të djalit të vdekur. Sipas Nju Jork Tajms, ka qenë Beau i cili i ka kërkuar të jatit, në prag të vdekjes, që të kandidojë në zgjedhjet e ardhshme presidenciale. Një lloj amaneti pra i djalit që nuk është më, mund të shtyjë zv.presidentin 72 vjeçar Biden që të hyjë në një garë të vështirë për kreun e Shtëpisë së Bardhë.
