Prania e Lionel Messi në Shtetet e Bashkuara ka kaluar kufijtë e futbollit dhe është shndërruar në një fenomen kulturor e ekonomik.
Në zemër të lagjes artistike Wynwood në Miami, një mural gjigant me portretin e yllit argjentinas mbulon fasadën e një ndërtese gjashtëkatëshe, ndërsa në dyqanin zyrtar të Inter Miami CF, pranë stadiumit të ri të klubit, tifozët presin në radhë për të fotografuar statujën e tij. Madje, një sektor i stadiumit mban emrin “Leo Messi Stand”, duke e kthyer futbollistin në një ikonë ende aktive në fushë dhe një monument jashtë saj.
Ndikimi i kapitenit të Argjentinës nuk reflektohet vetëm në popullaritet, por edhe në suksesin financiar të Federatën e Futbollit të Argjentinës.
Vetëm një dekadë më parë, federata argjentinase ndodhej pranë falimentimit dhe kishte vetëm gjashtë sponsorë, prej të cilëve vetëm dy ishin ndërkombëtarë. Sot situata ka ndryshuar rrënjësisht.
Federata e Futbollit numëron rreth 120 sponsorë, mes tyre kompani të njohura si American Express, McDonald’s dhe Google Gemini. Të ardhurat vjetore kanë arritur në rreth 150 milionë dollarë, ose mbi 130 milionë euro, duke e bërë federatën shumë më pak të varur nga të drejtat televizive.
Sipas raportit Brand Finance 2026, marka e kombëtares argjentinase vlerësohet me 91 pikë nga 100, duke u renditur në vendin e parë në botë dhe duke lënë pas edhe The Football Association me një diferencë prej 20 pikësh.
Transformimi i AFA-së është kthyer në një rast studimor në Harvard Business School, është trajtuar në librin De Argentina al Mundo të profesorit Eduardo A. Gamarra dhe po shndërrohet gjithashtu në një serial për Amazon.
Gjatë Kupës së Botës, drejtori i marketingut të AFA-së, Leandro Petersen, ka vijuar zgjerimin e partneriteteve ndërkombëtare. Në Dallas ai nënshkroi një marrëveshje sponsorizimi me China Mobile dhe zhvilloi bisedime me kompaninë kineze DoubleEagle.com, ndërsa u takua edhe me drejtuesit e klubit të Dallas Cowboys për të shkëmbyer përvoja në fushën e marketingut sportiv.
Strategjia e federatës ka qenë të mos i shohë ligat amerikane si rivale, por si një mundësi për të zgjeruar audiencën. Një nga momentet më të suksesshme ishte takimi i Messit me LeBron James në Miami. Fotografia e publikuar në rrjetet sociale ndikoi në rritjen e shitjeve të fanellave të Argjentinës, ndërsa gjatë Copa América, dyqanet Adidas në Nju Jork mbetën pa fanellat e Messit, pavarësisht kufizimit prej pesë copësh për klient.
Sipas autorit Eduardo Gamarra, fanella e Argjentinës ka qenë gjithmonë simbol historik, por me Lionel Messin është shndërruar në një markë globale, ndërsa futbollisti pritet të mbetet një nga ambasadorët më të fuqishëm të sportit edhe pasi të përfundojë karrierën.
