Mbi 15 kandidatë nga forca të ndryshme politike, por kryesisht ato të Partisë Socialiste i janë drejtuar KQZ-së me një kërkesë për pamjet filmike të numërimit të votave preferenciale.
Sipas asaj që bën të ditur gazetarja e Klan News, Klesiana Omeri mes kandidatëve që kanë bërë kërkesë janë Blerina Gjylameti, Etilda Gjonaj, Frrok Gjini dhe Xhemal Qefalia nga rradhët e Partisë Socialiste.
Blerina Gjylameti është në një garë të ngushtë me kolegen Olta Xhaçka, ku kjo e fundit është 102 vota para nga numërimet deri tani.
Nga Partia Demokratike kërkesë kanë bërë deputetët Ilir Alimehmeti dhe Aulon Kalaja.
Kujtojmë se Ilir Alimehmeti humbi betejën për mandatin në kryeqytet me një diferencë të ngushtë me demokraten Jorida Tabaku.
Kërkesat për pamje filmike të numërimit të votës preferenciale vijnë pas pretendimeve të kandidatëve për deputetë se vota për ta është keqlexuar.
