Marrë shkas edhe nga aksidenti i rëndë që ndodhi një ditë më parë, 25 qershor në kryeqytet, ku një makinë përplasi tre fëmijë të mitur, është ngritur edhe një herë alarmi për rrezikshmërinë e monopatinave. Ndërkohë që shumë shtete të botës kanë marrë masa kufizuese për përdorimin e monopatinave, vendi ynë akoma nuk ka bërë hapa drejt kësaj.
I ftuar në emisionin “Opinion” në Tv Klan, gazetari Merin Maçi sqaroi ndryshimet dhe saktësimet që duhet të marrë Policia e Shtetit dhe Ministria e Brendshme, për qarkullimin me monopatinë, duke nisur nga sinjalistika, shenjat e qarkullimit, e deri tek rrugët specifike.
Megjithatë, sipas asaj që gazetari nënvizon, monopatinat nuk janë vetëm një burim aksidenti, por dhe një mjet transporti që përdoret masivisht nga grupet kriminale. Dhe jo… për t’u arratisur.
Merin Maçi sqaron se grupet kriminale përdorin monopatinat për të ndjekur shënjestrën e tyre, ose për vendosjen e eksplozivit.
“Duhet të nisë nga organi kompetente Policia e Shtetit, por edhe Ministria e Brendshme për të futur ndëshkimet për monopatinat, por dhe të gjitha specifikimet e saj, qoftë për moshën që e përdor, pasi pjesa më e madhe e përdoruesve janë edhe minoren, ku ligji për ta është edhe më i lehtësuar. Ku në këto raste ndëshkimi u bëhet personave të cilët kanë prindër. Nga ana tjetër ka dhe një specifikë të rrugëve apo edhe sinjalistikës që duhet përdorur, shenjat dalluese, por edhe të gjitha sinjalistikat e tjera siç kanë motomjete apo edhe biçikletat.
Krahas aksidenteve dhe problematikave që shkaktojnë në rrugët e qytetit, monopatinat janë kthyer kohët e fundit edhe në një mjet që janë përdorur nga grupet kriminale. Vitin e kaluar janë përdorur për këqyrjen e personave që kanë për objektiv për t’i goditur për atentate, apo edhe për vendosjen e lëndëve eksplozive që janë vendosur në kryeqytet”, tha gazetari Merin Maçi.
