Bazhdari, Ademi dhe Eni Vasili në një tavolinë.
Çfarë mund të bëjnë tre zonja të hijshme me nga një shishe ujë përpara? Natyrisht që do të flasin, ndoshta edhe pa ditur se ëndrra e shumë burrave është të dëgjojnë fshehurazi çfarë thonë gratë. Por kur bëhet fjalë që tre zonjat ndodhen rreth një tavoline të rrumbullaktë xhami, të ndriçuara nga projektorë të fortë dhe të ndjekura nga kamerat, atëherë kureshtja është e jashtëzakonshme. Kjo do të ndodhë sot në darkë në Studion e Hapur të Eni Vasilit, e cila siguroi përballjen më spektakolare të debatit në këto zgjedhje lokale: dy kandidatet e Shkodrës, Keti Bazhdari e të majtës dhe Voltana Ademi e të djathtës, vijnë për herë të parë së bashku në një studio televizive.
Dilemat e Shkodrës së nesërme, alternativat e zhvillimit që nga turizmi e deri tek bujqësia në një qytet që me ndarjen e re territoriale ka marrë dhe dhjetë komuna më tepër, janë temat e debatit të sotëm. “Shiheni në orën 20.30. Jam e bindur se do të shihni në ekran dy qytetare që debatojnë për një qytet”, thotë gazetarja Vasili e News 24.
Përveç përballjes mashkullore dhe të ashpër të dy kandidatëve për Kamzën që i bëri bashkë Ylli Rakipi tek Ora News, kjo është ndeshja e parë publike e kandidatëve për bashkitë. Shkodra është një nga garat më të interesante, por dhe të ashpra në vend dhe të dy palët premtojnë surpriza.
Një javë më parë, në panelin e Rudina Xhungës ishin dhe dy gra të tjera që konkurojnë për kryetare bashkish, Duma për Durrësin dhe Zamira Rami për Gjirokastrën, por aty nuk pati debat mes kandidatesh, por gjithashtu shumë qytetari. Që deri më tani, fatmirësisht, nuk ka munguar në të gjithë këtë fushatë.
