Ministri për Kthim e komunitete në Qeverinë e Kosovës Dalibor Jevtiç ka deklaruar se suspendimi i Marrëveshjes për Asociacionin e Komunave serbe është përpjekje e shqiptarëve për të shtyrë implementimin e saj. Ai ka theksuar se kjo do të ndikonte keq në kthimin e serbëve. “Këtu bëhet fjalë kryesisht për besimin që përpiqemi ta ndërtojmë pas disa vjetësh… Ajo që është në marrëveshje duhet të zbatohet dhe mendoj se fjala është për shtyrjen e zbatimit të Marrëveshjes së AKS-së, marrëveshjes më të rëndësishme për popullin serb në Kosovë”, ka thënë Jevtiq për B92, transmeton Koha.net.
Ai ka shtuar se AKS-në e sheh si shans që kthimi i serbëve të zgjidhet në mënyrë tjetër.
“Kur flasim për kthimin e të shpërngulurve, përgjegjësia më e madhe bie mbi shumicën shqiptare dhe kur e them këtë, flas me përvojën që e kam. Disa herë jemi përpjekur të kthejmë serbët në Mushtishtë të Suharekës, por nuk ia kemi dalë, sepse bashkësia shumicë në këtë mjedis nuk është e gatshme të përkrahë kthimin”, ka thënë Jevtiq.
