Shkrimtari Luan Rama ishte i ftuar në Shqip nga Rudina Xhunga në Dritare TV. Zoti Rama foli për shqiptarët e Parisit, artistët që kanë shkëlqyer ndër vite në Francë. Ndër to, Rama përmendi foli edhe për jetën e kryeministrit, si artist në Paris.
Gjatë bisedës me gazetaren Rudina Xhunga, ai tregoi se ishte shkrimtari që e ka përcjellë kryeministrin Edi Rama në aeroport, kur ai u kthye përfundimisht në Shqipëri.
Unë e lidhja me Paolo Uccello, një piktor i madh i 1500 dhe thosha nga Paolo Uccello tek Edi Rama. Rama ishte i interesuar në jetën intelektuale, kishte kontakte, ishte një njeri me vizion perëndimor. Pavarësisht problemeve që mund të kishte me politikanët në Shqipëri. Asokohe Fatos Nano erdhi në Paris, bëri një vizitë zyrtare, takoi Ramën dhe kur u largua i tha se kishte dëshirë që ai të vinte në Shqipëri si ministër i Kulturës.
Dhe më kujtohet që unë e kam përcjellë në aeroport me makinë. Ramës në atë kohë i ndërroi jetë babai, dhe e shoqërova unë. Madje i dhashë edhe një kollare, sepse do të shkonte direkt në varrim. Kemi pasur një marrëdhënie të afërt.
Kur ishte kryetar bashkie filloi fushatën e madhe të prishjes buzë Lanës të ndërtesave dhe më pëlqeu si veprim. Ishte në kurajo shumë e madhe. Unë në atë kohë bëra një shkrim që Baron Haussmann zbarkon në Shqipëri. Baron Haussmann ishte një prefekt i Parisit i cili vendosi bashkë me perandorin francez, nipin e Napoleonit, për të transformuar Parisin.
Ai i tha ja ku është harta e Parisit. Qyteti ishte gjithë rrugë qorre, pa trotuare, bulevarde. Dhe i tha ne do ta bëjmë Parisin kështu. Ai e mbështeti megjithëse e sulmuan shumë. I njëjti fenomen si në Shqipëri me Ramën. Pas asaj kohe nuk kemi takuar më”, u shpreh zoti Rama.
Ai tregoi për herë të parë historinë e tij, si një djalosh i lindur në bulevardin “Stalin” që takoi presidentin francez François Mitterrand.
Në këtë intervistë ai flet edhe për ish-kryeministrin Sali Berisha dhe mënyrën si e shikonte Perëndimi rikthimin e tij.
“Shqipëria është një vend shumë i vështirë për t’u drejtuar. Sepse pati një precendent të rrezikshëm politik, ekonomik, social, i cili ishte Sali Berisha. Ne e filluam me Berishën, por po të ishte një politikan tjetër më i qetë, më largpamës, që mos të vinte veriun me jugun kundër njëri-tjetrit, që të mos të bëhej narcist i pushtetit dhe të mos vinte pushtetin mbi interesat nacionale, do të krijonte një lloj trashëgimie. Mirëpo guri i parë që u vendos në demokraci, u vendos keq.
Në Francë as që mendohet rikthimi i Berishës. Është një personazh i mbaruar. Perëndimi do një Shqipëri europiane, që të krijojë një kulturë tjetër në fushën ekonomike dhe sociale. Shpresoj që gjërat do të vijnë gradualisht.”, u shpreh ai.
