Polemika të forta janë krijuar në Tiranë për votën e djeshme të Shqipërisë në Kombet e Bashkuara në favor të rezolutës që hedh poshtë vendimin amerikan për të njohur Jeruzalemin si kryeqytet të Izraelit, dhe për të lëvizur atje ambasadën e SHBA. Opozita ka folur për “një qëndrim të gabuar”. Kritik është shfaqur dhe presidenti Ilir Meta, sipas të cilit një qëndrim i tillë i Shqipërisë ka qenë “tërësisht i panevojshëm”.
Ish-ministri i PD-së, Besnik Mustafaj thotë se zhurmat e krijuara për këtë çështje tregojnë “një shprehje naiviteti nga ana e opinionit tonë politik, por edhe publik”.
Në rubrikën “Opinion” në “News24”, Mustafaj tha se opozita me qëndrimin e saj ndaj votës së Shqipërisë në OKB, “po kërkon probleme aty ku nuk ka”. Sipas tij, që në kohën kur PD erdhi në qeveri, u vendos një standard sipas të cilit, Shqipëria votën e saj në OKB do ta kishte në përputhje me qëndrimin e BE-së.
“Rezoluta e OKB nuk përmend në asnjë moment SHBA. Por është një rezolutë që ndalet tek çështja për Jeruzalemin kryeqytet të Izraelit. Komuniteti ndërkombëtar duke patur parasysh sensitivitetin që ka ndaj kësaj çështje, ka marrë këtë iniciativë në Asamblenë e Përgjithshme të OKB, për t’i ndërprerë hovin spostimit të ambasadave drejt Jeruzalemit. Në Jeruzalem ka tre institucione shumë të rëndësishme.
Kur PD erdhi në qeverisje është vendosur një standard që ne votimin tonë në OKB do ta kishim në përputhje dhe konsensual me qëndrimin e BE. Pra gjithë kjo zhurma që është ngritur është një shprehje naiviteti nga ana e opinionit tonë politik, por edhe publik. Më shqetëson një aspekt i kësaj që po ndodh, që është përfshirja plot zell e opozitës për ta trajtuar këtë si një sjellje anti-amerikane. Nuk duhet të krijosh probleme aty nuk ka”, u shpreh Besnik Mustafaj.
