Edhe kreu i LIBRA-s, Ben Blushi ka një koment për votën e Shqipërisë në OKB.
Pas një mungese në skenën politike, Blushi gjen rastin për të hyrë duke thënë se asgjë nuk e justifikon votën tonë. Sipas tij ky qëndrim i shërben vetëm Turqisë.
Ditën e djeshme Shqipëria u Rreshtua krah vendimit të vendeve të tjera të BE-së për të rrëzuar qëndrimin Trump për të njohur Jerusalemin si kryeqytet të Izraelit.
Sipas tezës së Blushit i bie që e gjithë Evropa i ka shërbyer Turqisë në këtë proces.
“Asgjë nuk e justifikon votën e djeshme të Shqipërisë në OKB. As raporti me Evropën, as raporti me SHBA, as raporti me historinë dhe as raporti me të drejtën.
Duke mos qenë as strategjike dhe as parimore vota kundër SHBA i vlen më shumë Turqisë se Shqipërisë dhe kjo është edhe më e rëndë më e shëmtuar dhe shumë më e padrejtë.
Ne kemi votuar një rezolutë kundër SHBA pa asnjë shkak real dhe pa asnjë arsye serioze.
“Për të gjithë ata që duan të fshihen pas historisë së votimeve në OKB kam një pyetje. Në fund të fundit për çfarë kemi votuar?
Që një vend sovran, në këtë rast SHBA nuk duhet të ketë të drejtë ta zhvendosë ambasadën nga Tel Avivi në Jerusalem
Kush jemi ne që detyrojmë një shtet tjetër, se në cilin vend të një shteti tjetër duhet ta mbajë ambasadën e vet?
Kjo që kemi bërë është njëlloj sikur të votonim një rezolutë sipas të cilës SHBA duhet ta mbajnë ambasadën e Kosovës në Beograd. ‘Një shtet levantin’, do thoshte Faik Konica” thotë Blushi.
