Nga Fieri ku mori pjesë në një aktivitet sensibilizues në kuadër të tetorit rozë, organizuar nga Spitali Rajonal Fier, kreu i grupit parlamentar socialist, Taulant Balla është ndalur tek paketa anti-shpifje.
Balla u shpreh se ndryshimet për ligjin e medias tashmë janë tërhequr nga propozuesit. Ai tha se rezoluta kundër dezinformimit qëndron në kuvend, teksa tha se ekziston rreziku i financimit të mediave nga Rusia sikurse u tha në raport.
“E para, dua tju them se ndryshimet në ligjin për median, që kanë të bëjnë me shpifjen janë tërhequr nga propozuesi. Dua tju rikonfirmoj se ne e kemi tërhequr ato ndryshime ligjore që janë bërë para tre vitesh.
Në kushtet që jemi, edhe në shumë vende ka rezoluta në PE kundër dezinformimin dhe ne kemi një rezolutë të tillë dhe në fakt kemi një rrezik të vazhdueshëm që sponsorizohet me rublat ruse. U tha qartë që Rusia ka ndikuar në minimin e demokracisë, duke favorizuar edhe mediat.
Ky pushtet i katërt duhet të mos bjerë në financimet e paligjshme nga aktorët që minojnë demokracinë”,- tha Balla.
Në prag të zgjedhjeve vendore, Balla tha se pritet të nisë edhe një tur takimesh në të gjithë vendin, gjatë të cilit do të vlerësohen punët e kryera nga të gjithë kandidatët.
“Që në javën e parë të këtij turi, do jetë edhe Fieri. Do kemi takime ne çdo cep të qarkut. Fieri është qershia mbi tortë e çdo suksesi dhe rezultati pozitiv të Partisë Socialiste. Ky tur është për vlerësim dhe llogaridhënie publike dhe natyrshëm do të vlerësojmë hap pas hapi”- tha Balla.
I pyetur nëse ka klane brenda PS në Fier, Balla është shprehur se kjo mbetet vetëm një shpresë e opozitës, pasi PS nuk është e përçarë, madje është ofruar të bashkohet edhe me opozitën për sfidat e përbashkëta.
“S’kam përgjigje se këto janë vetëm shpresa e vetme, e fundit të kundërshtarëve politikë të PS. Në fier ata s’fitojnë kurrë por kanë shpresën që ne jemi të ndarë dhe ata të fitojmë. Ne po duam të bashkohemi me ta në kuptimin e sfidave të përbashkëta, jo më të ndahemi vetë”- u shpreh Balla nga Fieri.
/a.r
