Në mbyllje të konferencës “30 vite partneritet dhe progres, Shqipëria, Këshilli i Europës dhe Komisioni i Venecias”, deputeti i Partisë Demokratike, Gjin Gjoni, u përplas verbalisht me deputetin socialist dhe kreun e Komisionit të Ligjeve, Ulsi Manja.
Manja, në rolin e drejtuesit të punimeve, deklaroi mbylljen e fjalimeve, por Gjoni kërkoi që të respektohej agjenda dhe të lejohej diskutimi i mëtejshëm.
“Zoti Manja, në qoftë se respekton agjendën, duhet ta respektosh deri në fund, kështu që dua të diskutoj, se jemi me Venecian këtu, nuk është normale që s’më lë të diskutoj”, iu drejtua Gjoni-Manjës.
Pas përfundimit të konferencës, Gjin Gjoni u shpreh për mediat se, ndryshe nga pretendimet që u bënë gjatë panelit, reforma në drejtësi nuk ka dhënë fryte. Ai argumentoi se kjo konfirmohet nga perceptimi i qytetarëve.
“Tani, nëse reforma ka qenë vërtet e suksesshme, siç pretendohet edhe në këtë konferencë, pse atëherë perceptimi i qytetarëve, pas 10 vitesh, është kaq negativ?”, u shpreh Gjoni.
Deputeti theksoi se proceset gjyqësore janë bërë shumë më të gjata dhe vonesat në arsyetim janë shqetësuese.
“Dikur një proces gjyqësor përfundonte për 6 vjet; sot zgjat 16 vjet. Dikur një vendim gjyqësor arsyetohej për 30 ditë; sot duhen 1,000 ditë. Qytetarët presin 4 vjet vetëm për një arsyetim”.
Ai shtoi se kjo situatë nuk është vetëm një problem funksional, por “një reagim i drejtpërdrejtë i njerëzve ndaj një sistemi që nuk po u jep drejtësi.” Madje, shtoi Gjoni, edhe për krime të rënda si vrasjet, drejtësia shpesh nuk jep përgjigje.
“10 vjet pas reformës në drejtësi, rezulton se vetë sistemi ende nuk e ka gjetur veten”, tha Gjoni.
Deputeti demokrat denoncoi gjithashtu lidhjet politike brenda drejtësisë, duke paralajmëruar rreziqe serioze për pavarësinë e saj.
“Nëse i shohim sot drejtuesit e sistemit të drejtësisë, një pjesë e madhe e tyre janë produkte të zyrave të partive politike. Kjo është një kambanë alarmi! Ata që ishin në tryezë sot, ata që realizuan vettingun, janë po ata që sot kërkojnë të ngjiten në pozicionet më të larta të drejtësisë”.
Gjoni përmendi se shumë nga këta janë anëtarë të komisioneve të mbikëqyrjes institucionale dhe institucioneve drejtuese, duke hedhur dyshime mbi objektivitetin e reformës.
