Agjencia e vlerësimit të riskut, “JCR Euroasia Rating” mbajti të pandryshuar vlerësimin për borxhin e Shqipërisë në BB+ duke e shoqëruar atë me një vlerësim pozitiv për perspektivën.
Në deklaratën shoqëruese të vlerësimit JRC, vlerëson se, perspektiva makroekonomike të Shqipërisë shihet me një rritje pozitive e ndikuar me se shumti nga integrimi në BE-në i vendit dhe marrëdhëniet e bashkëpunimit të ngushtë me FMN-në dhe Bankën Botërore.
Por JRC vë në dukje gjithashtu se, Shqipëria paraqet nevoja të ngutshme për reforma të mëtejshme strukturore, si investimet në infrastrukturë dhe integrimi i ekonomisë informale në sferën ligjore të ekonomisë shihen si thelbësore për mbajtjen gjallë të rritjes ekonomike.
Procesi i vazhdueshëm i anëtarësimit me BE-në dhe vijimësia e bashkëpunimit me FMN do të shërbejnë si dy spiranca politike dhe financiare.
Çështje themelore të identifikuara edhe në vlerësimet e mëparshme që vijojnë të jenë shqetësime janë borxhi veçanërisht i lartë publik, përqendrimi i borxhit publik në bankat tregtare.
Raportet e larta të kredive me probleme, papunësia e lartë dhe deficiti i lartë i llogarisë korente vazhdojnë të bëjnë presion në perspektivën ekonomike.
JRC vlerëson se, angazhimi i Shqipërisë për konsolidimin fiskal dhe politika akomoduese monetare të Bankës së Shqipërisë (BSH) japin sinjale se ekonomia po ecën në rrugën e duhur.
FMN kompletoi shqyrtimin e shtatë të marrëveshjes në mars 2016, duke vënë në dukje, progres në lidhje me reformat strukturore dhe përmirësimin e financave publike.
Për më tepër, ulja e normave të interesit nga Banka e Shqipërisë dhe emetimi i suksesshëm i Eurobondit ka ulur kostot e huamarrjes së qeverisë në mënyrë të konsiderueshme.
“Në periudhën afatmesme dhe atë afatgjatë, ne presim rikuperimin e normave të rritjes së ekonomisë dhe përmirësimin e barrës së borxhit publik, duke pasur parasysh uljen kostos së huamarrjes së sektorit” thuhet në deklaratën e vlerësimit të JRC-së./Monitor/a.m.
