Kur kanë mbetur edhe 9 ditë nga afati për zgjedhjen e presidentit të Kosovës, kryeparlamentarja Albulena Haxhiu bën thirrje për gjetjen e një konsensusi mes partive, për shmangien e zgjedhjeve të parakohshme.
28 prilli është afati i fundit i caktuar nga Gjykata Kushtetuese për zgjedhjen e presidentit të Kosovës, ndaj për kryeparlamentaren Albulena Haxhiu kjo javë e mbetur konsiderohet vendimtare.
“Uroj që të nisë me takime ndërmjet partive politike, për faktin se nuk kanë mbetur edhe shumë ditë, por në qoftë se ka vullnet mund të kryhet brenda shumë pak orësh.”
Haxhiu, që është aktualisht ushtruese e detyrës së presidentes, u bëri thirrje partive që të mos i refuzojnë ftesat e Kurtit për negociata.
“Mendoj që është shumë e rëndësishme që vendi të mos shkojë në zgjedhje të jashtëzakonshme. I ftoj që të përbashkohen, të unifikohen, e pastaj betejat për çështje të tjera i lëmë pas zgjedhjes së presidentit”.
Kurti ka negociuar deri më tani vetëm me kreun e Lidhjes Demokratike të Kosovës, Lumir Abdixhiku, i cili ka kërkuar që presidenti i ri të mos jetë një person i propozuar nga Vetëvendosja. Ndërsa Partia Demokratike e Kosovës kërkon që ftesa për negociata t’i paraqitet zyrtarisht me shkresë nga ana e Kurtit.
