Shifrat dramatike që vijnë matanë kufirit kanë qenë temë e panelit në emisionin “Java” në RTSH. Bëhet fjalë për 180 shqiptarë të vrarë në rrethana të ndryshme në Greqi, që prej vitit 1991.
“Një bilanc lufte në kohë paqeje, ndërsa në të gjitha rastet qeverisjet shqiptare kanë heshtur. Dhe për të reaguar nuk duhet forcë, por mend dhe shpirt” – tha analisti Lorenc Vangjeli.
Por ajo që e rëndon bilancin janë humbjet e jetëve të 6 shqiptarëve në vetëm 10 ditët e fundit. Gazetari investigativ Artan Hoxha u shpreh se ndërkohë që Parlamenti Europian e detyron Shqipërinë të hetojë me vrasjen e Kostandin Kaçifas, vendi ynë nuk ka bërë as reagimin më minimal ndaj vendit fqinj.
Për analistin Preç Zogaj, interesimi i shtetit për shtetasit e vet kudo ku jetojnë është detyrim kushtetues. Qeveria duhet të informohet dhe të formojë qëndrimine saj për vrasjet nga policia greke. Që duhen ndarë nga aksidentet dhe vrasjet për arsye kofliktesh me shtetas te tjerë”, tha Zogaj.
“Zakoni shumëvjeçar është ky që shteti shqiotar rendom i trajton si fëmijë të humbur emigrantët, sidomos kur këta bien në fatkeqësi. Ku qëdnrim ka shpjegimin e vet, por jo justifikimin” tha ai. “Unë do doja që ngjarjet e fundit matanë kufirit të ishin një koiçidencë dhe të mos kishin lidhje me rastin Kaçifas. Por mendja gjithmonë të shkon në një atmosferë e ngarkuar me urrrejtje që prodhon tragjedi edhe aty ku mund të shmangen” – tha Zogaj në emisionin “Java”.
Nga ana tjetër, Vangjeli kritikoi tre kryeministrat e fundit: “Nanon për ‘dashurinë’ për ruletat greke, Berishën për nacionalizëm folklorik dhe Ramën për deklaratat e bujshme” –tha ai.
Sipas tij, vetëm reciprociteti sjell bashkëjetesë e dasma dhe largon vajin e funeralet.
“Ekstremet puqen gjithmonë. Grekët e bënë me Kacifasin. Me shumë zhurmë. Por edhe heshtja shqiptare për këta viktima, është e njëjta gjë. Është edhe padituri, edhe inferioritet” – tha Lorenc Vangjeli.
Ndërkohë, për herë të parë, gazetari Artan Hoxha bëri publike detaje nga çfarë pritet në vijim. Duket se data 8 Dhjetor do të shënojë sërish tensione në fshatin Bularat teksa mbushen 40 ditë nga ekzekutimi i Kostandin Kaçifas.
“Një peligrinazh po tentohet të mbahet në Bularat. A do ta pengojnë autoritetet tona dhe a do të hynë sërish në Shqipëri personat e shpallur non grata? Kjo mbetet për t’u parë” – tha Hoxha.
***
Zbulohet taktika e PD: Të gjithë deputetët e saj kundër Dakos
Emisioni “Java” në RTSH solli detaje të reja nga ‘lufta’ politike që PD i ka shpallur kryebashkiakut të Durrësit.
Redaksia mëson se Partia Demokratike ka në dispozicion pjesë të veçanta të dosjes hetimore 339, që i ka marrë kohë më parë nga personazhe që kishin akses të plotë mbi të.
Në këtë dosje, me disa qindra orë të tjera përgjime të pazbardhura ende, ndër të tjerë, përmendet edhe kryetari i bashkisë së Durrësit. I supozuar për lidhje të papërshtatshme me elementë kriminalë, me përdorimin e tyre për fushatën zgjedhore dhe dhënien në këmbim të favoreve të pamerituara.
Në tre javët e fundit, pothuajse çdo ditë, një deputet i partisë demokratike ka kërkuar arrestimin e zotit Dako si të lidhur me krimin. Duke krijuar kështu një front të përbashkët kundër kryetarit të bashkisë së Durrësit.
Në përpjekje për të dekurajuar akuzat ndaj tij, kryebashkiaku durrsak ka paditur penalisht cilindo nga akuzuesit e tij.
“Siç po duket, ai do të vihet përpara të gjithë deputetëve të opozitës në sallën e gjyqit, përveç rastit kur dosja e famshme 339 nuk ka vajtur vetë në gjykatë, bashkë me të vërtetat e fshehura ende në mijëra faqe dokumentash dhe mijëra orë përgjimesh sekrete” – thekson redaksia e emisionit “Java” të premten mbrëma.
***
Takimi i Pejës, show mediatik apo projekt?
A ishte takimi i Pejës një spektakël patriotik, apo projekt i pashmangshëm? Për të debatuar rreth mbledhjes së përbashkët të dy qeverive Kosovë-Shqipëri ishin të ftuar në emisionin “JAVA” deputetët Ervin Bushati, Aldo Bumçi dhe Edmond Haxhinasto.
“Po të shohim atë që po ndodh, mbizotërojnë simbolikat por ka shumë pak përmbajtje. Pra janë takime boshe. Ne kemi dy çështje të rëndësishme siç është ajo e shkëmbimit të territoreve. Dhe kjo temë kaq e rëndësishme rezulton e padiskutuar në tryezën mes Haradinajt dhe Ramës. E dyta, kemi rastin e Rrugës së Kombit. Të gjitha marrëveshjet Shqipëri-Kosovë janë si një letër pa vlerë pa këtë shtyllë kurrizore që lidh dy vendet. Në asnjë mbledhje të përbashkët nuk është diskutuar çështja e taksës” – tha Bumçi.
Për deputetin e LSI, Edmond Haxhinasto, askush nuk i pengon të dy vendet që marrëveshjet t’i firmosin çdo ditë. Nga ana tjetër, Haxhinasto e ka cilësuar si integrim me Kosovën, dhe jo bashkim.
“Ne jemi të detyruar të ndjekim rrugën e BE. Bashkimi ynë do të ndodhë brenda kësaj familje europiane duke integruar ekonomitë dhe duke hequr kufijtë. Por ne mund t’i bëjmë disa gjëra edhe pa bërtitur. Për shembull, heqja e patentave mund të ishte bërë më përpara. Askush nuk na pengon neve për të punuar çdo ditë për çështje të tilla. Nga ana tjetër ne nuk mund t’i imponohemi Bashkimit Evropian duke përdorur një retorikë kushtezuese” – tha ish-ministri Haxhinasto në emisionin “Java” në RTSH.
Ndërkohë, për deputetin Ervin Bushati kjo mbledhje edhe pse e pesta, krijoi më shumë diskutime për shka të mesazheve që dha.
“Përveçse janë finalizuar më shumë se 9 marrëveshje, Shqipëria sot është bërë një lojtar në rajon. Vendi ynë ka folur për mirëkuptim mes fqinjëve për të mos importuar probleme në BE. Sot, Kosova është një shtet i pavarur dhe sovran dhe vendimet për taksat i merr vetë. Me rëndësi është që dy vendet tona janë me një zë” – tha Bushati.
Ndërkohë, analisti Preç Zogaj u shpreh se e vetmja gjë konkrete që është parë deri më sot, është taksa që u vendos në Rrugën e Kombit. Sipas tij, gjëja më e mrië e takimit mes dy qeverive në pejë ishte paketa e marrëveshjeve për integrimin e dy ekonomive, por që u eklipsua falë zakonit të kryeministrit të Shqipërisë , Edi Rama, për të shkuar përtej ngjarjeve që prodhon vetë apo me të tjerë, duke u veshur gjeste e deklarata që dihet se do të shkaktojnë zhurmë, reagime e pikpyetje, pa shumë lidhje me thelbin e ngjarjes, tha Zogaj.
“Gjithsesi, nëse këto marrëveshje dhe të tjera pas tyre fillojnë të zbatohen, mund të themi se takimi i Pejës ishte një shoë me elementë turbullimi , por që shkon në drejtimin e duhur. Bashkimi kombëtar është një ëndërr për t’u bërë në bashkëpunim dhe sintoni me partnerët tanë strategjikë, SHBA dhe BE”, nënvizoi analisti Preç Zogaj.
***
Drama e të moshuarve, Peza: Mungojnë politikat sociale
Vetëvrasja tragjike e dy të moshuarve në Berat solli në emisionin “Java” psikologen Anxhela Pezë. Duke komentuar dramën e brezit të tretë, Peza tha se përveç problemeve ekonomike, mosha në fjalë shoqërohet edhe me sëmundje kronike dhe mendore.
Për analistin Lorenc Vangjeli, sot familja shqiptare nuk është më ajo tipikja. “Për shkak edhe të emigracionit, sot janë krijuar ishuj vetmie” – tha Vangjeli.
“Mosha e tretë ka si deficit madhor vetminë dhe ky fenomen është global. Kjo sjell tek individi një tkurrje deri në zhvillimin e sëmundjeve mendore duke ia hequr njeriut dëshirën për të jetuar” – tha Peza.
Sipas saj, në Shqipëri mungojnë politikat sociale, teksa solli në vëmendje edhe kapacitetet e ulëta në shtëpitë e të moshuarve.
“Para viteve 90, familja shqiptare drejtohej nga gjyshi ndërsa sot raporti ka ndryshuar shumë. Shumë shpesh mediat e fokusojnë vëmendjen tek fëmijët dhe gratë dhe shumë mirë bëjnë, por duhet t’i jepet hapësirë edhe moshës së tretë ” – tha psikologia Anxhela Peza.
Ndërkohë, në emër të redaksisë, analisti Lorenc Vangjeli dha edhe një mesazh.
“Duke ju lutur që kjo të merret edhe si një mesazh i redaksisë, mos harroni një përqafim për prindërit. Mund të zgjasë një çast, por vlen shumë” – tha ai në përfundim të emisionit.
