Në kuadër të ‘Javës së albanologjisë’, që do të mbahet në Prishtinë mes datave 23-27 maj, do të organizohet edhe sesion shkencor me temë ‘Letërsia dokumentare’. Instituti Albanologjik në Prishtinë njofton vendim u mor pasi që u konsiderua se letërsia dokumentare shqipe deri më tash nuk është studiuar sa duhet dhe se aplikimi për këtë sesion tashmë është hapur.
“Nisur nga fakti se letërsia dokumentare shqipe, deri më tash nuk është studiuar sa duhet, përkundër faktit se pikërisht me një vepër dokumentare zë fill edhe historia e letërsisë dhe e mbarë kulturës shqiptare (‘Historia e Skënderbeut’ e Marin Barletit) dhe se ky lloj i letërsisë, duke i pasur parasysh rrethanat nëpër të cilat shekuj me radhë kaloi populli ynë, në periudha të caktuara shënoi ngritje edhe në sasi edhe në cilësi, Dega e Letërsisë e Institutit Albanologjik në Prishtinë vendosi që në edicionin e sivjetmë në kuadër të aktivitetit tashmë të përvitshëm, ‘Java e Albanologjisë’, ta trajtojë temën ‘Letërsia dokumentare’”, thuhet në kumtesën e Institutit Albanologjik. Studiuesit e interesuar titujt e kumtesave bashkë me një rezyme të shkurtër duhet t’i paraqesin më së voni më 15 prill.
Bëhet e ditur se disa nga tezat e mundshme për trajtimin e temës së sesionit shkencor “Letërsia dokumentare” janë çështjet teorike, fillet e letërsisë dokumentare shqipe, letërsia dokumentare shqipe në veprat e humanistëve shqiptarë, romani autobiografik në letërsinë shqipe, letërkëmbimet, letërsia dokumentare shqipe pas rënies së diktaturës në Shqipëri, letërsia dokumentare shqipe në diasporë, letërsia dokumentare shqipe pas çlirimit të Kosovës, e të tjera.
