Turistët që vizitojnë Japoninë tashmë nuk do të kenë më probleme me tualetet publike.
Kaosi i krijuar për shkak të gjuhës së pakuptueshme të tabelave në tualetet e vendosura në ambiente publike, ka detyruar autoritetet japoneze të publikojnë udhëzues në disa gjuhë mbi përdorimin e duhur të tyre si në stilin japonez ashtu dhe në atë europian.
Sipas së përditshmes japoneze “The Japan Times”, deri më tani turistët që kanë vizituar Japoninë kanë shkaktuar jo pak probleme me ndotjen duke përdorur gabimisht tualetet.
Udhëzuesi për përdorimin e tualeteve ofrohet në gjuhët japonisht, anglisht, kinezisht dhe koreanisht, dhe ofron këshilla rreth qëndrimit të duhur gjatë përdorimit të tualetit si dhe për mënyrën e duhur të hedhjes së letrës së përdorur të tualetit.
