Kompania mediatike Pearson bën të ditur se Financial Times i është shitur medias japoneze, Nikkei për 1.31 miliardë dollarë (844 milionë paund). Transaksioni, që mund të përfundojë deri në fund të vitit, nuk përfshin pjesën prej 50 për qind të ”The Economist Group” mbajtur aktualisht nga ”FT Group”.
Edhe grupe të tjera mediatike janë përfolur si blerës të mundshëm, si publicisti gjerman Axel Springer. “Perason ka qënë proanr kryesor i Financial Times për 60 vjet. Por ne kemi arritur në një pikë ndryshimi në media, drejtuar dhe nga rritja e shpejtë e rrjeteve sociale dhe telefonëve”, ka thënë shefi ekzekutiv i Pearson, John Fallon. Megjithatë shitja e Financial Times Group nuk përfshin 50% të aksioneve të Pearson tek “The Economist”.
E përditshmja ekonomike britanike lexuar nga drejtuesit dhe vendimmarrësit nga i gjithë planeti, ”Financial Times”, që do të ndryshojë dorë, është në mënyrë të pashmangshme bibla e botës së biznesit. Njohur për faqet e saj ngjyrë salmoni, gazeta është konsideruar si referenca kryesore ndërkombëtare për informacionin ekonomik dhe financiar. “Është e përditshmja kryesore e botës së biznesit, me një audiencë ndërkombëtare që e tejkalon atë të rivalit të saj ”Wall Street Journal”.
Është një burim jetik për shumë në sajë të përsosmërisë së burimeve të saj si dhe forcës së komenteve dhe analizave që mbulojnë tregjet, ekonominë dhe zhvillimet politike”, theksoi Steve Schifferes, profesor i gazetarisë financiare në ”London’s City University”.
Nisur në vitin 1888, FT ka njohur një sukses të menjëhershëm në Britaninë e Madhe para se të merrte një dimension vërtet botëror pas blerjes së saj në vitin 1957 nga shtëpia botuese ”Pearson”, pronar i saj deri në ditët e sotme. E përditshmja, që punëson më shumë se 600 gazetarë botohet sot në më shumë se 20 qytete në mbarë botën, nga Nju Jorku në Tokio duke kaluar nga Hong Kongu, Paris dhe Dubai.
