Trajner i Kombëtares Xhani De Biazi premton se kuqezinjtë do të japin maksimumin në Europianin që starton pas tri javësh në Francë.
Tekniku italian ka vlerësuar mbështetjen e tifozëve në ndeshjet eliminatore dhe bëri thirrje që një interesim të ngjashëm ta tregojnë edhe në finalet e “Euro 2016”.
“Një nga gjërat më të bukura që kam parë këtu në Shqipëri janë tifozët. Futbollistët tanë kanë qenë shumë të zotë për të arritur këtë rezultat dhe unë shpresoj shumë që ata (tifozët) të vijnë në Francë sepse për ne janë shumë, shumë të rëndësishëm”,-tha në një intervistë për televizionin “News24”.
I pyetur nëse Januzaj është penduar që nuk pranoi të luante me Shqipërinë, De Biazi theksoi se tashmë futbollisti nuk është grumbulluar as nga trajneri i Belgjikës dhe kjo i përket të kaluarës.
“Januzaj nuk është grumbulluar me Belgjikën në Europian. Do të rrijë duke e parë ndeshjen nga kolltuku. Ai mund të kthehet nga Kosova tani, mund të jetë nga të parët që mund ta bëjë këtë”,-deklaroi De Biazi. Deklarata e trajnerit vjen një ditë pas listës me 27 futbollistë që ai publikoi para dy miqësoreve të radhës.
