Borussia Dortmund është e interesuar të afrojë Adnan Januzaj në formë huazimi për një sezon nga Manchester United. Lajmi është bërë publik nga gjermania “Sport1″. Talenti me origjinë shqiptare u
afrua në ekipin e parë në “Old Trafford” nga ish-tekniku David Moyes dhe menjëherë u cilësua si ylli i së ardhmes.
Por, gjatë sezonit të kaluar, sulmuesi mbeti në hije. Trajneri Louis van Gaal i dha shumë pak shanse, duke e lënë më së shumti në stolin e rezervave.
Gjatë këtij sezoni, “Djajtë e Kuq” po aktivizojnë mjaft lojtarë të rinj dhe Januzaj ka luajtur si titullar kundër Aston Villas dhe përballë Club Brugge në sfidën playoff të Champions League.
Kjo sugjeron që 20vjeçari mbetet në planet e Van Gaal, të paktën edhe për këtë edicion. Megjithatë, së fundmi janë shtuar zërat se në rast të përforcimit me një tjetër sulmues, drejtuesit e Manchester United do të lejojnë largimin e Januzajt.
Transferimi te Borussia Dortmund është një alternativë e pëlqyeshme. Gjermanët mbeten një prej klubeve më të rëndësishme në Europë dhe luajnë në Champions League. Duket e vështirë të thuhet sa hapësira mund të ketë sulmuesi në “Westfalenstadion”, vetëm nëse skuadra nuk përfshihet nga një tjetër krizë dëmtimesh. Përveç gjigandëve të Bundesligës, Januzaj kërkohet edhe nga rivalët e Southamptonit në
Premier Leaguen angleze. /Supersport/
