Elias Mazloum ishte i ftuari i kësaj të hëne në studion lëvizëse të “Aldo Morning Show” në Tv Klan. Ai është më origjinë nga Libani, por prej vitesh jeton në Shqipëri. E kush tjetër përveçse dashuria mund të sillte atë nga një kontinent në tjetrin.
Ai tregon se në Afrikë është njohur me një vajzë shqiptare, gjysmë nga Vlora e gjysmë nga Kukësi. Dashurinë e tyre ata e kurorëzuan në martesë dhe prej vitesh jetojnë së bashku në vendin tonë. Elias Mazloum e quan veten të shqiptarizuar, ndërkohë që është në proces pritjeje për të marrë letrat shqiptare.
Elias Mazloum: Mirë se ju gjeta! Jam shqiptarizuar tani, nuk jam më …
Aldo: Me letra je shqiptar?
Elias Mazloum: Jam në proces, por jam Qytetar Nderi në Tropojë.
Aldo: Nusen nga e ke marrë?
Elias Mazloum: Është një bisedë e gjatë! Ajo është gjysmë nga Kukësi e gjysmë nga Vlora.
Aldo: Gjysmë nga Kukësi e gjysmë nga Vlora! Po nga e gjete mor burrë?
Elias Mazloum: Në Afrikë.
Aldo: Një sekondë tani, një nuse gjysmë kuksiane e gjysmë vlonjate ta gjesh në Afrikë! Sa shanse ose probabiliteti ka?
Elias Mazloum: Një milionë besoj. Gruaja punonte me një bankë përpara. Punë bankash në Ganë, ishte konsulente dhe unë kam qenë atje, punoja. Jemi takuar e më pas u dashuruam.
Aldo: Ti e dije që ekzistonte një shtet me emrin Shqipëri?
Elias Mazloum: Shumë pak.
Aldo: Kishte rënë muhabeti ndonjëherë?
Elias Mazloum: Jo asnjëherë. Kisha dëgjuar shumë për Kosovën, por për Shqipërinë jo.
