Gjendja jo e mirë shëndetësore e Erjon Alibej ka sjellë dështimin për të dytën herë të procesit gjyqësor ndaj të pandehurve Euglen Halili dhe Xhuliano Hoxha, të cilët akuzohen nga SPAK për vrasjen e Emiljano Ramazanit dhe Regis Runaj.
Alibej, i thirur në këtë seancë në cilësinë e bashkë të pandehurit dhe dëshmitarit të prokurorisë, duhet të dëshmonte kundër dy miqve të tij, të cilët i ka përdorur për të kryer dy vrasjet në Elbasan.
Alibej ka depozituar në gjykatën e posaçme, kërkesën për mosprezencën e tij në gjyq, pasi kishte shqetësime shëndetësore. Edhe në seancën e parë gjyqësore, Alibej nuk ka pranuar të përballet me dy miqtë e tij, duke pretenduar se do fliste në një moment të dytë, pasi kishte probleme familajre.
Regis Runaj dhe Emiljano Ramazani, u ekzekutuan në verën e vitit 2020 dhe për këto dy vrasje SPAK ka arrestuar Erjon Alibej si financues, Nuredin Dumanin, Xhuljano Hoxhën, Euglen Halilin, Skerdi Tasin dhe Henrik Hoxhën.
Të gjithë këta persona kanë vepruar si grup kriminal duke kryer vrasje me pagesë. Fillimisht për këto dy ngjarje foli Euglen Halili dhe më pas Nuredin Dumani dhe Henrik Hoxhaj.
Ndërsa tashmë i penduar, ka dalë dhe Erjon Alibej, i cili ka folur për llogari të prokurorëve të SPAK, raporton OraNews./m.j
