Ish-deputetja e PD-së Jorida Tabaku ka reaguar sërish përmes një postimi në facebook lidhur me projektvendimin për të përjashtuar nga TVSH importuesit e jahteve, dërguar në Kuvend më 10 prill 2020.
Në reagimin e saj Tabaku shkruan se mbrëmë të kapur në flagrancë, ministrat e kabinetit qeveritar, nxituan të përgënjeshtronin vendimin që i përjashton importuesit e jahteve nga TVSH por jo sipërmarrjet që vuajnë sot krizën e pandemisë.
“Tani kushdo e ka të qartë se fytyra e vërtetë e qeverisë në 7 vjet ka qenë pikërisht kjo. Abuzo me pushtetin, jepu vetëm një grushti individësh lehtësira fiskale dhe më pas propagando sikur po punon për shqiptarët. Ky ka qenë dhe është rrethi vicioz i qeverisë prandaj nuk është habi që edhe sot të vazhdojnë të njëjtën skemë. Megjithëse hera herës, kur nevoja thërret janë të gatshëm të shiten edhe si luftëtarë pro-shqiptarëve e gjoja të luftojnë oligarkinë me fjalë por jo me vepra. Në realitet bëjnë atë qe kanë bërë në 7 vite: vetëm mbështesin oligarket me çdo mënyrë me ligje speciale, me favore me tendera! Bamirës me oligarkët, arrogant me ato në nevojë”, shkruan Tabaku në postimin e saj. /e.s/
