Presidentja e Kosovës, Atifete Jahjaga edhe një herë u ka bërë ftesë të gjitha subjekteve politike në Kosovë që zgjidhja të bëhet nëpërmjet dialogut sepse nuk mund të sfidohet shteti. Kurse, ambasadori amerikan në Kosovë, Greg Delawie ka përsëritur se Kuvendi nuk është vend i armëve dhe deputetët duhet ta respektojnë ligjin si qytetarët tjerë. E para e vendit tha se Kosova ka hyrë në një fazë të re të një marrëveshjeje të rëndësishme kontraktuale me Bashkimin Evropian, prandaj, sipas saj duhet konsensus i plotë i të gjithë shoqërisë për rrugën drejt integrimeve.
Ajo tha se Bashkimi Evropian nuk ka alternativë për Kosovën dhe njëkohësisht është pika që bashkon gjithë popullin e Kosovës, pa dallim, duke shtuar se kjo rrugë kërkon nga më shumë përkushtim dhe më shumë punë, por mbi të gjitha kërkon dialog dhe marrëveshje.
