Presidentja e Republikës së Kosovës, zonja Atifete Jahjaga u prit në Shtëpinë e Bardhë nga Zëvendëspresidenti amerikan Joseph Biden. Me këtë rast u bisedua, siç thotë deklarata presidenciale, transmeton Koha.net, për konsolidimin e Republikës së Kosovës, situatën e sigurisë në Kosovë dhe rajon dhe përpjekjet e saj për t’i thelluar reformat politike dhe ekonomike në rrugën e saj drejt integrimeve evropiane.
Presidentja Jahjaga shprehu mirënjohjen e saj administratës amerikane për përkrahjen dhënë institucioneve të Republikës së Kosovës për të konsoliduar dhe forcuar demokracinë në vend dhe për subjektivitetin shtetëror në arenën ndërkombëtare.
Presidentja Jahjaga theksoi përparimin, siç e ka quajtur ajo të gjithëmbarshëm, të Kosovës për të funksionalizuar institucionet dhe sfidat me të cilat përballet vendi. Ajo tha se me gjithë vështirësitë, Kosova ka qëndruar e palëkundur në tetë vjet të shtetësisë së saj për t’i përmbushur përgjegjësitë e saj.
Presidentja Jahjaga tha se institucionet e Kosovës vazhdojnë të jenë të përkushtuara të vazhdojnë dialogun me Republikën e Serbisë për të normalizuar relacionet mes dy vendeve si alternativën e vetme për të arritur paqe të qëndrueshme në rajon dhe për të shpejtuar procesin e integrimeve euroatlantike të dy vendeve. Ajo po ashtu theksoi nevojën që ky proces të përqendrohet edhe në implementimin e marrëveshjeve të arritura me ndërmjetësimin e Bashkimit Evropian.
