Presidentja e Republikës së Kosovës, Atifete Jahjaga, priti sot në takim gjeneral John Allen, i dërguar special presidencial në koalicionin global kundër ISIS-it, ku bën pjesë edhe Kosova.
Gjatë takimit Jahjaga e njohu Allen me veprimet e ndërmarra nga institucionet e Kosovës dhe mekanizmat e sigurisë për të parandaluar dhe për t’u përballur me kërcënimin terrorist global që paraqet ISIS-i dhe grupet tjera eterroriste të lidhura me të, përfshirë masat e sigurisë dhe ato legjislative të vendosura për të pamundësuar aktivitetet, organizimin dhe çfarëdo veprimtarie radikale e ekstremiste në Kosovë.
Presidentja Jahjaga theksoi se veprimet e hershme të institucioneve të Kosovës e kanë shndërruar Kosovën në shembull për luften ndaj këtij fenomeni dhe sfide të sigurisë.
Jahjaga shprehu vendosmërinë dhe nënvizoi përpjekjet konkrete të institucioneve të Kosovës që vendi ynë asnjëherë të mos bëhet strehë e grupeve terroriste apo burim i ekstremizmit.
Ajo theksoi domosdoshmërinë për bashkërendim të veprimeve dhe bashkëpunim të afërt ndërmjet shte teve të rajonit me qëllim të luftimit të dukurive që po kërcënojnë stabilitetin dhe sigurinë e vendit, të rajonit dhe më gjerë.
Jahjaga po ashtu u përkushtua që institucionet e Kosovës të punojnë intensivisht në zbatimin e rekomandimeve që dalin nga aktivitete të ndryshme të koalicionit global kundër ISIS-it që ndërlidhen me procesin e parandalimit dhe rehabilitimit.
Allen vlerësoi anëtarësimin e Kosovës në koalicionin global në luftën kundër ISIS-it dhe pjesëmarrjen e saj në Grupin Punues të Koalicionit për shpërndarjen e mesazheve të kundërta.
Gjenerali Allen dhe Presidentja e Kosovës u pajtuan rreth rëndësisë së shkëmbimit të të dhënave dhe të informacioneve për të ndihmuar në ndalimin e valës së luftëtarëve të huaj dhe i diskutuan një varg mënyrash se si mund të zgjerohet dhe thellohet përqasja ndaj komuniteteve që mund të rrezikohen nga radikalizmi./Kosovapress
