Presidentja e Republikës, Atifete Jahjaga ka mirëpritur kthimin e kreut të AAK-së, Ramush Haradinaj në Kosovë, disa ditë pas ndalimit të tij në Slloveni.
“Mirëpres kthimin e deputetit të Republikës së Kosovës dhe liderit të Aleancës për Ardhmërinë e Kosovës, zotëri Ramush Haradinaj pas ndalimit në Slloveni, veprim ky që është bërë sipas një fletarresti politik dhe të pabazë të lëshuar nga shteti i Serbisë”, thuhet në njoftimin e Presidenvës së Kosovës, raporton Zeri.
Aty më tutje thuhet se Jahjaga falënderon institucionet e Republikës së Sllovenisë dhe instancat më të larta të shtetit mik për bashkëpunimin e menjëhershëm për t’i dhënë fund këtij ndalimi të pabazë dhe për të mundësuar lëvizjen e lirë të Haradinajt.
“Në javët në vijim do të bashkërendohemi me të gjitha institucionet e vendit dhe ato ndërkombëtare për të adresuar një herë e përgjithmonë çështjen e fletearresteve të pabaza që po cenojnë lirinë e lëvizjes së qytetarëve të Kosovës”, thuhet në fund.
