Presidentja e Kosovës Atifete Jahjaga, ka akorduar të martën dekoratën Urdhri “Hero i Kosovës”, për kolonelin Tahir Zemaj. Zemaj, një nga figurat kyçe të Forcave të Armatosura të Republikës së Kosovës, ishte vrarë në një atentat në janar të vitit 2003. Vrasja e tij nuk është zbuluar asnjëherë. Dy krahët luftës, UÇK dhe ajo që njihet si FARK kanë dallime të mëdha për figurën e tij. Njeriu që njihet në opinion si simbol i rezistencës kombëtare, Adem Demaçi, kolonelin nga Deçani e kishte akuzuar për trafik droge.
Presidentja e Kosovës Atifete Jahjaga ka ndarë dekoratën për Komandantin Tahir Zemaj, njërin nga njerëzit kyç të atyre që njihen si Forca të Armatosura të Republikës së Kosovës të themeluara nga Qeveria e Kosovës në ekzil.
Për këtë dekoratë kanë njoftuar familjarët e Tahir Zemajt, i cili ishte vrarë në një atentat në vitin 2003. Vrasja e tij nuk është zbuluar asnjëherë. Bashkë me Zemajn ishte vrarë edhe i biri dhe nipi i tij. “Presidentja e Kosovës Znj. Atifete Jahjaga bëri ndarjen e dekoratave për komandantin dhe strategun e betejës së Loxhës, kolonel Tahir Zemajn, me Urdhrin ‘Hero i Kosovës’ si dhe për dëshmorët Enver Alaj dhe Lumni Surdulli me ‘Medaljen e Artë të Pavarësisë’, në bazë të vendimit të ish-Presidentit Fatmir Sejdiu i marrë me rastin 12 vjetorit të betejës së Lavdishme të Loxhës .15/12/2015 Prishtinë” ka shkruar në Facebook deputeti i LDK’së Armend Zemaj.
Më 2002, Zemaj kishte dëshmuar në procesin gjyqësor kundër pesë ushtarakëve të lartë të ish UÇK-së të cilët ishin burgosur për rrëmbim dhe vrasjen e katër pjesëtarëve të FARK-ut.
Për njerëzit e afërt me Lidhjen Demokratike, Tahir Zemaj konsiderohet si njëri nga njerëzit kyc të luftës, sidomos në atë që njihet Betejë e Loxhës. Ndërkohë që kundërshtarët që kryesisht janë përkrahës të krahur tjetër të luftës konsiderojnë se Zemaj pikërisht në këtë betejë ka dezertuar. Për figurën e tij është shprehur edhe veprimtari Adem Demaçi i cili kolonelin nga Deçani, ushtarak karriere në APJ, e kishte akuzuar si trafikant të drogës.
