Gjykata e Apelit në Shkodër ka marrë në shqyrtim dosjen në ngarkim të vëllezërve Besnik dhe Edmond Kodra dhe Sokol Mjacaj 17 vjeç, të cilët akuzohen për kryerjen e vrasjes në bashkëpunim ndaj 13 vjeçarit Agim Lera në fshatin Pjollë të komunës Shalë në muajin Shtator të vitit 2010.
Tre të burgosurit janë sjellë nga burgu i Shën Kollit të shoqëruar nga dhjetëra forca policie, pasi vëllezërit Kodra, përkatësisht 28 dhe 20 vjeç akuzojnë të miturin Mjacaj për dëshmi të rreme.
Një situatë e tillë ka bërë që në dhomën e burgut ku qëndronin të burgosurit pranë gjykatës së Apelit të nisë një sherr mes vëllezërve Kodra dhe të mituri Mjacaj, por ndërhyrja e menjëhershme e gardianëve të grupit te shoqërimit ka bërë që të shuhet konflikti.
Ndërkohë gjatë seancës gjyqësore pa praninë e mediave pala mbrojtëse ka kërkuar nga trupi gjykues që kryesohej nga Musa Halili, përsëritjen pjesërisht të seancës gjyqësore dhe ripyetjen e disa dëshmitarëve.
Sipas avokatëve mbrojtës në dosjen në ngarkim të 3 të dënuarve janë vërejtur pavlefshmëri aktesh. Ndërkohë togat e zeza të gjykatës së Apelit kanë kërkuar kohë dhe kjo gjë ka sjellë shtyrjen e seancës gjyqësore.
Në gjykatën e shkallës së parë Besnik Kodra është dënuar me burgim të përjetshëm, ndërsa vëllai i tij Edmond Kodraj me 11 vite burg dhe Sokol Mjacaj me 10 vite burg për veprën penale te vrasjes në bashkëpunim.
Gjatë seancave në shkallën e parë Sokol Mjacaj ka qenë personi që ka dëshmuar në lidhje me vendndodhjen e trupit te pajetë të 13 vjeçarit në ujërat e lumit Shalë, pranë grykës së Ndërshejit.
Mjacaj gjithashtu ka dhënë detaje edhe për mënyrën se si dy vëllezërit Kodra kanë kryer vrasjen makabër, duke torturuar dhe keqtrajtuar 13 vjeçarin Lera deri sa i kanë shkaktuar vdekjen. Sipas Mjacajt, dy vëllezërit Kodra e kanë përplasur disa herë në gurë dhe në fund e kanë asfiksuar deri sa i mituri ka ndërruar jetë në mënyrën më çnjerëzore.
Ndërkohë, gjatë gjithë seancave gjyqësore Besnik dhe Edmond Kodra kanë mohuar akuzën e vrasjes, duke deklaruar se i mituri Mjacaj është duke i implikuar padrejtësisht në këtë krim të rëndë. Nga ana tjetër Sokol Mjacaj gjatë seancave gjyqësore ka ndryshuar mbi 7 herë dëshminë në lidhje me ngjarjen e rëndë.
(Shkrim i www.shqiptarja.com, dt.18 tetor 2012)
