Të hënën fillon viti i ri akademik për sistemin universitar dhe studentëve ju duhet sërish ta zhvillojnë mësimin virtualisht nga kufizimet e Covid – 19. Semestrin e dytë të vitit të kaluar ata ishin po online dhe u përballën me shumë vështirësi, të cilat kanë ndikuar dhe do të ndikojnë në krijimin e boshllëqeve në përvetësimin e dijeve dhe rezultatit që ata presin në fund të studimeve, si në Bachelor ashtu dhe në nivelin Master.

Aplikacionet e komunikimit që kanë zgjedhur pedagogët janë joefektive

Sistemi ynë universitar u gjet i papërgatitur për ndjekjen e mësimit virtualisht. Trupave pedagogjike jo desh kohë e gjatë të futeshin në lojë. Sepse dhe vetë profesorët nuk ishin të familjarizuar me përdorimin e aplikacioneve në komunikim. Një sondazh i realizuar së fundmi nga grupimi studentor ABC Tirana Club me 550 studentë nga 6 universitete publike të vendit, identifikon si faktorin më negativ në mbarëvajtjen e mësimit përzgjedhjen nga pedagogët të aplikacionit për komunikimin në grup, 28.4 përqind. Në përgjigjet e tyre, 22 përqind e studentëve pohoi si faktor më negativ prezantimin e temave nga pedagogët dhe 20.9 përqind cilësinë e linjës së internetit që studentët kishin në dispozicion.

Sa i takon eficencës në marrjen e njohurive, duke krahasuar formatin virtual dhe atë në auditor, rreth 40 përqind e studentëve e përshkruan si “më keq” ose “shumë më  keq”. Kurse për shfrytëzimin e literaturës së detyrueshme në kushtet e mësimit online rreth 45 përqind e tyre pohuan se ishte “më keq” ose “shumë më keq”, krahasuar me kushtet kur ata e zhvilluan mësimin në auditor gjatë semestrit të parë.

Bazuar në të dhënat e sondazhit që u realizua me studentët në Vlorë, Korçë, Durrës, Elbasan, Gjirokastër dhe Shkodër, më shumë se gjysma e tyre, 52.9 përqind, janë shprehur se dëshirojnë që programi mësimor të zhvillohet me prezencë në auditor. Ndërkohë që 10.2 përqind preferojnë versionin online dhe pjesa tjetër, 36.9 përqind, janë shprehur se duan kombinimin e të dyja metodave.

Mbështetja për studentët në kushtet e mësimit në distancë

Sondazhi që është publikuar gjatë kësaj fundjave, është pjesë e një projekti studentor që po zbaton ABC Tirana Club. mbështetur nga Agjencia për Mbështetjen e Shoqërisë Civile. Në fazën e dytë, të projektit ne do të jemi prezent tek studentët për mbështetjen e tyre për të qenë sa më efektivë në kushtet e zhvillimit të procesit mësimor në distancë, thotë Johan Muka, drejtues i ABC Tirana Club.

“Duke angazhuar ekspertë të teknologjive të informacionit që të ndajnë me studentët eksperienca praktike të përdorimit të platformave të komunikimit në grup, për metodat më efikase të kërkimit të literaturës, kryerjes së detyrave të kursit, punimeve të diplomës etj.”

Aktivistët e ABC Tirana Club do të përgatisin dhe një broshurë në soft copy dhe hard copy, e cila do të qarkullojë në mjediset studentore në universitetet publike “Ismail Qemali”, “Fan Noli”, “Aleksandër Moisiu”, “Aleksandër Xhuvani”, “Eqerem Çabej” dhe “Luigj Gurakuqi”.