Nga dje kanë filluar ethet e vërteta të maturantëve për garimin në universitete. Me pesë komponentët e njohur tashmë, ata kanë nisur përllogaritjen e pikëve bazuar në formulën e shpallur për degët që dëshirojnë, shkruan “Panorama”.
Nëse vjet nuk kishin kurrfarë orientimi për shkak të formulës së ndryshuar tërësisht, në garën për vitin e ri akademik ata mund t’u referohen pikëve të fituesit të fundit të vitit të kaluar.
“Panorama” boton sot tabelën me pragun minimal hyrës në fazën e parë të shpalljes së fituesve, përpara uljeve të njëpasnjëshme të vizës së kuqe, që ndante fituesit me humbësit. Në garën e këtij viti, raundet mbeten dy, por me faza të përcaktuara regjistrimesh 48-orëshe, çka duket se do të garantojë moszvarritjen e procesit.
APLIKIMI
Për dhjetë ditë, të gjitha shkollat e mesme duhet të kenë përllogaritur notën mesatare për secilin maturant që kandidon për ndjekjen e studimeve. Ajo çka duhet të bëjnë këta të fundit përpara aplikimit në portalin e maturës është pagesa e mandatit prej 2 mijë lekësh në zyrat e postës apo në një bankë të nivelit të dytë, për ta dorëzuar në shkollë me qëllim hedhjen në sistem të notës mesatare.
Aplikimi online në portalin e maturës nis pas dy javësh, nga 20-29 korriku, dhe bëhet në bazë të një kalendari datash që pritet të publikohet këto ditë nga Qendra për Shërbimet Arsimore. Nga lista e degët, kandidatët do të duhet të listojnë dhjetë programe në universitetet publike e private që ofrohen në vend.
“Maturantët aksesosen në portal me kredencialet e tyre: ID e kandidatit, emri, atësia, mbiemri, karta e identitetit, e-maili i kandidatit e të tjera. Kandidatët zgjedhin deri në dhjetë programe studimi nga lista e programeve të studimit, që ofrohen nga IAL-të publike/jopublike për vitin akademik 2017-2018”, përcaktohet në udhëzimin e Ministrisë për pranimet në universitete. Ashtu si vitin e kaluar, në portal nuk do të mund të aplikojnë ata që nuk kanë pragun minimal hyrës të vendosur nga qeveria: nota 6.
GARA
Në përfundim të procesit të aplikimeve, brenda 23 gushtit, QSHA duhet t’u nisë universiteteve listën e aplikantëve bashkë me të dhënat për secilin prej tyre: notat e të gjitha viteve të shkollës së mesme, rezultatet e provimeve të maturës, mesataren e gjimnazit, atë të maturës shtetërore, atë të përllogaritur sipas VKM-së nr.346, datë 19.04.2017, dhe indekset e profileve të shkollave të mesme.
Në bazë të treguesve të mësipërm dhe formulës së përcaktuar më herët nga vetë ata, universitetet bëjnë rankimin e kandidatëve në varësi të pikëve të grumbulluara dhe kuotave në dispozicion. Në udhëzimin e Ministrisë për pranimet e reja, ky proces duhet të përfundojë brenda 28 gushtit, datë kur në çdo fakultet janë afishuar listat e aplikantëve fitues, duke i hapur rrugë një ditë më pas procesit të regjistrimeve për fazën e parë./Panorama/a.m.
