Zyrtarë doganorë të Arabisë Saudite kanë publikuar në Twitter fotografi të disa prej tentimeve më kreative për kontrabandim të alkoolit në këtë vend.
Disa prej fotografive të publikuara nga Dogana e Arabisë Saudite në profilin zyrtar në Twitter, paraqesin një burrë të veshur me një mantel nën të cilin kishte futur shishe të ndryshme alkooli, transmeton Koha.net.
Departamenti shpërndau një fotografi të atij personi, fillimisht të veshur me mantel, e pastaj edhe duke u zhveshur ku shiheshin shishet e fshehura.
Një set tjetër fotografish shfaq një tjetër person në tentim të kontrabandimit të pijeve alkoolike të fshehura nëpër xhepa të pantallonave të punuar special për këtë punë.
Agjencia doganore publikoi edhe fotografi të pijeve alkoolike të fshehura nëpër pjesë të ndryshme të veturave.
Në një rast tjetër, persona të ndryshëm kishin tentuar të kontrabandonin kanaçe birrash të kamufluara si Pepsi.
Kujtojmë se në Arabinë Saudite, posedimi i birrës apo alkoolit është i ndaluar dhe i ndëshkuar me burg apo rrahje me kamxhik.
