Në raportin e publikuar ditë më parë nga Zyra Federale për Statistikë, janë dhënë shifrat përfundimtare dhe të plota të të huajve që jetojnë në Zvicër.
Në të vërtetë, shifrat i referohen fundit të vitit 2014, por si e tillë, kjo statistikë është më e reja dhe më kompletja.
Sipas saj, në Zvicër jetojnë afër dy milionë njerëz me pasaporta të huaja, ose 24.3 për qind e popullatës së gjithmbarshme.
Të dhënat në këtë raport theksojnë se rreth dy të tretat e të gjithë të huajve janë nga shtetet e BE-së dhe Evropa Perëndimore. Numri më i madh i tyre vijnë nga Italia, e në radhë pas italianëve janë gjermanët, portugezët dhe francezët.
Ndërkaq në mesin e të huajve nga “vendet e treta”, vendin e parë e zënë shtetasit e Kosovës, të cilët kanë arritur shumë afër shifrës së 100 mijë (gjegjësisht në fund të vitit 2014 ata ishin saktësisht 99799).
Pas tyre vijnë shtetasit e Serbisë (78092) dhe ata të Maqedonisë (636516). Sigurisht, në shifrat e shtetasve të Serbisë përfshihet një numër i konsiderueshëm i shqiptarëve nga Kosova dhe nga Lugina e Preshevës.
Ndërsa, në numrin e shtetasve të Maqedonisë, pjesa dërmuese janë shqiptarë etnikë. Kështu, marrë së bashku, numri i shqiptarëve në Zvicër është dukshëm më i madh se sa tregojnë statistikat.
Kur kësaj i shtohet edhe numri i madh i shqiptarëve që kanë marrë pasaportat zvicerane, vetëm mund të supozohet se sa shqiptarë etnikë jetojnë në gjithë Zvicrën.
Sipas një statistike tjetër, asaj të azilit, në fund të qershorit ë këtij viti në Zvicër prinin azilkërkuesit nga Eritrea.
Pas tyre vijnë ata nga Somalia, Sri Lanka, Siria Afganistani, Nigeria, Gambia, Etiopia, Kina dhe, në vendin e dhjetë azilkërkuesit nga Kosova. /albinfo/
Lexo më shumë në: http://www.kosovarja-ks.com/sa-shqiptare-jetojne-ne-zvicer/?utm_source=referral&utm_medium=web&utm_campaign=copyright
