Nga Ardit Rada
Kur Ambasada e SHBA-ve në Tiranë ua vuri ‘kufirin te thana’ gjyqtarëve shqiptarë, duket se ka pasur një keqkuptim. Pozicionimi kritik i përfaqësisë diplomatike amerikane ndaj vizitës së Kryeprokurorit Llalla dhe deklarata e SHBA-ve se vizat do t’u mohohen edhe prokurorëve të korruptuar e përgjithësojnë vendimin e aleatit perëndimor duke e qartësuar faktin se nuk e kanë veç me gjyqtarët, por me të gjithë Drejtësinë.
Shuplakën e sotme në distancë ndaj Adriatik Llallës, ambasada fare mirë mund ta justifikojë për veprimet dhe mosveprimet e të parit të akuzës në vend, edhe pse nuk ka ndonjë detyrim të bëjë sqarim publik. Megjithatë, kanë qenë kanale nga Prokuroria e Përgjithshme që trumpetuan mbrëmë vonë takime mes Lallës dhe dy vartësve të tij që e shoqërojnë në Uashington, me përfaqësues të lartë të FBI dhe DEA-s.
Por pse ky reagim kaq i hapur dhe publik i SHBA-ve ndaj kreut të Akuzës nga i cili të gjithë i kanë, ose më saktë i kanë pasur sytë për pak shpresë në të bërin drejtësi? Është e qartë se Llalla nuk është i paprekshmi i amerikanëve të paktën dhe se kur ai flet, është dikush mbi palët që nuk hesht. Dikur ish-kreu i Deklarimit të Pasurive, Llalla njihet si i kapur politikisht nga PD dhe LSI qysh kur këto dy të fundit ishin në koalicion qeverisës.
Madje, i gjithë drafti i Reformës u tejzgjat në diskutime vetëm për t’i shpëtuar mandatin atij dhe ndonjë kryetari Gjykatë po aq të kapur nga politika. E megjithatë, kjo nuk do t’i mjaftonte amerikanëve për ta nxjerrë kreun e Prokurorisë si një turist në vizitë private. Te Llalla ka diçka tjetër që nuk shkon.
Ai konsiderohet gjerësisht nga publiku si pengesë për luftën ndaj korrupsionit, si palë me ish-ministrat që shqiptarët mezi presin të gjykohen, si drejtues i një institucioni karagjoz që tërhiqet nga proceset pa bërë apelim, si organ hetimor që çuditërisht nuk ka asnjë pistë për ngjarjet e bujshme si ‘Artan Santos’ etj. Dhe mbi të gjitha, Llalla njihet si Kryeprokurori që deklaron se shumë shpejt do të ketë hetim të zyrtarëve të lartë, dhe kjo ‘shumë shpejt’ po zgjat 3 vite. Dhe këto tre vite e vetmja gjë që e lidhi Prokurorinë me zyrtarë të lartë ishte kur ‘harroi’ të bënte rekurs për çështjen Fullani.
