Ja kush përjashtohet nga kasa fiskale
Edhe pse prej ditësh po flitet vetëm për kasat fiskale dhe kuponin tatimor, ka edhe një kategori që nuk ka pse ta përdorin atë.
Kështu, të gjithë ata biznese apo profesione të lira, të cilat i kryejnë veprimet financiare nëpërmjet transaksioneve bankare, nuk është e nevojshme të pajisen me kasë fiskale.
Pasi vetë transaksioni bankar është i ligjëruar dhe i regjistruar pranë organeve fiskale. Sipas burimeve zyrtare nga Drejtoria e Përgjithshme e Tatimeve, me kasë fiskale do të pajisen të gjithë ato biznese që ofrojnë mallra apo shërbime në “cash”.
Ndërkohë, referuar legjislacionit në fuqi, (Ndryshuar me Vendim Nr. 354, dt. 9.05.2013, botuar ne Fl. Z. Nr. 73, dt. 24.04.2013), nuk janë të detyruar të përdorin pajisje fiskale, sipas kërkesave të këtij vendimi, ambulantët dhe shërbimi i transportit, në bazë të ligjit “Për sistemin e taksave vendore”.
Gjithashtu të përjashtuara nga ky proces janë biletat e Lotarisë Kombëtare, të miratuara nga Ministri i Financave. Kompania e licencuar për ushtrimin e Lotarisë Kombëtare nuk është e detyruar të instalojë e të përdorë pajisje fiskale, pasi vetë biletat e Lotarisë Kombëtare janë kupon fiskal.
Qeveria tashmë ka bërë efektiv aksionin e paralajmëtuar për uljen e informalitetit. Aktualisht ka një ndërgjegjësim të subjekteve private për pajisjen me kasa fiskale, çka ka rezultuar me rradhë të gjata në zyrat e QKR. / Scan Tv
Redaksia Java News/ f.g
