Javanews/ Ben Blushi së bashku me disa deputetë të tjerë kanë formuar atë që nga dita e djeshme do të quhet Lëvizja për Drejtësi. Ka qenë Maqo Lakrori i cili në emër të kësaj lëvizje ka shpallur platformën në Asamblenë Kombëtare të PS-së. Por cfarë përmban platforma e Lëvizjes për Demokraci, kush janë pikat e saj kryesore?
Në thelb të programit të kësaj Lëvizje qëndrojnë dy formate propozimi, njëri në lidhje me objektivat që duhen ndjekur në PS dhe qeverisje, ndërsa tjetri në lidhje me disa ndryshime të nevojshme statutore në parti. Së treti, platforma vë në dukje gjithashtu dhe nevojën për një analizë të hapur dhe racionale të punës së deritanishme të qeverisjes së majtë.
-Objektivat që vë në tryezë Lëvizja për Demokraci kanë të bëjnë pikë së pari me respektimin e ligjeve dhe demokracisë së brendshme në PS.
-Një propozim i rëndësishëm është krijimi i një komisioni të posaçëm që do të kontrollojë të gjitha pasuritë e politikanëve, duke nisur nga Presidenti e Kryeministri e më poshtë, që më pas dosjet t’i çohen gjykatës.
-Rishikimin e ndryshimeve kushtetuese të vitit 2008
-Një tjetër synim është dhe mbështetja e reformave, duke nisur që nga korrigjimi dhe realizimi i premtimeve të papambajtura të qeverisë, sidomos për punësimin dhe ekonominë.
Në lidhje me ndryshimet statutore, Lëvizja për Demokraci në PS ka propozuar që funksionet partiake dhe ato qeverisëse të jenë të ndara nga njëra tjetra dhe mandatet e rëndësishme si ai i kryetarit të PS-së të mos jenë më shumë se dy.
Një tjetër propozim i rëndësishëm është dhe kërkesa për ta vendosur në statut oponencën e grupeve brenda PS-së.
Një ndryshim tjetër është dhe mocioni për qeverisjen qendrore dhe vendore, që sipas dokumentit, mund të propozohet që nga njësia bazë e PS-së (OS – organizata socialiste) deri tek organet më të larta të saj.
Pse quhet Lëvizja për Demokraci në Partinë Socialiste
Në dokument sqarohet edhe arsyeja se përse është vendosur që lëvizja të quhet “LD”.
“Partia Socialiste është produkt kolektiv dhjetravjeçar i qindramijë kontributeve individuale, nga të gjitha shtresat shoqërore dhe brezat, nga e gjithë Shqipëria… Asnjëherë nuk është vonë që çdo socialist, çdo individ e grupim shoqëror i interesuar për dobinë e kësaj pasurie kombëtare, të angazhohet për ta rivendosur demokracinë në PS. Për këtë arsye ne, një grup socialistësh, e kemi emërtuar nismën tonë Lëvizja për Demokraci në Partinë Socialiste”- shkruhet në dokument.
