Jemi në sezonin veror dhe pushimet disa ditore i meriton kushdo pas një viti të ngarkuar me punë dhe impenjime të shumta. Destinacionet e pushuesve shqiptarë janë të ndryshme, jashtë dhe brenda vendit. Por nëse shqiptarët vendosin të pushojnë brenda vendit, vendet që ata zgjedhin janë kryesisht në jug, si në Vlorë, Himarë, Borsh, Dhërmi, Jalë, Sarandë etj. E ndërsa pushimet janë në pik, ankesat për çmime jo të arsyeshme janë pa fund. Prej ditësh qarkullojnë në rrjete sociale, kryesisht “Facebook”, fatura nga baret dhe restorantet e bregdetit nga Veriu në Jug të vendit.
Përshembull, një pije freskuese “Lemon Soda” që në market kushton minimalisht 60 lekë të reja, në Voskopojë kushton 500 lekë të reja. Pushuesit duhet të mendohen mirë edhe kur porosisin një shishe me ujë natyral, pasi ky produkt kushton gjashtë herë më shumë se në një dyqan ushqimor. Ky është abuzim masiv që po ndodh rëndom dhe deri tani nuk po merren masat e duhura, pavarësisht aksionit të përbashkët të Drejtorisë së Përgjithshme të Tatimeve dhe Policisë së Vlorës. Gjithashtu vihen re edhe luhatje çmimesh nga njëri vend në tjetrin, pavarësisht afërsisë mes tyre.
Qytetarë të ndryshëm kanë denoncuar abuzimet e larta që po bëhen me çmimet e produkteve në rrjetet sociale dhe njëkohësisht shprehen të indinjuar duke thënë se me një shumë parash të caktuara mund të kalohet më bukur jashtë Shqipërisë. Faturat me çmime të majme po bëjnë xhiron e rrjeteve sociale, madje kjo është kthyer edhe në debat midis komentuesve ku disa mendojnë që ja vlen të shpenzosh për t’u kënaqur e të tjerë thonë që kur çmimet janë të larta edhe shërbimi duhet të jetë më i mirë. Përpos denoncimeve online, deri më tani situata vazhdon të jetë po aq alarmante si në fillim./Shekulli/
