Rizgjedhja e Donald Tuskut për kryetar të Këshillit Evropian për një mandat të ri prej dy vjet e gjysmë pa pajtimin e shtetit të tij, Polonisë, ka prishur seriozisht atmosferën në të cilën të premten është zhvilluar dita e parë e takimit të Këshillit Evropian në Bruksel.
Polonia kishte kërkuar që të shqyrtohet një kandidat tjetër, por vendet e tjera anëtare ishin pajtuar që Tusku duhet të marrë edhe një mandat, ndërsa kundërshtimin e Polonisë e quajtën si “konflikt të brendshëm politik”, shkruan Koha Ditore.
Qeveria e tashme konservatore e Polonisë ka kritikuar ish-kryeministrin e këtij vendi, Tusk, i cili tash në Bruksel është në krye të Këshillit Evropian, se “nuk e ka zbatuar si duhet rolin e tij neutral” dhe se “është përzier në punë të brendshme të Polonisë dhe nuk i ka mbrojtur interesat e këtij vendi”.
Gjatë fjalimit të tij, pas rizgjedhjes, Tusk është përqendruar edhe te Ballkani, duke alarmuar shtetet anëtare për gjendjen në Ballkanin Perëndimor.
“Këtë mbrëmje, udhëheqësit do të adresojnë situatën në Ballkanin Perëndimor, një rajon që është vital për Evropën. Tensionet dhe përçarjet janë shkallëzuar, pjesërisht për shkak të ndikimeve të jashtme dashakëqija, që po destabilizojnë disa vende prej kohësh”, ka thënë Tusk.
“Unë do t’i propozoj udhëheqësve që të ndërmarrin masa, përfshirë në komunikimet tona strategjike. Për vendet e rajonit, mesazhi ynë do të jetë i qartë: Bashkimi Evropian i qëndron pas premtimit të Selanikut, dhe mbetet plotësisht i angazhuar për stabilitetin dhe prosperitetin e rajonit. Unë dua që liderët të rikonfirmojnë perspektivën evropiane për Ballkanin Perëndimor”, ka deklaruar Tusk. (b.an)
