Izraeli thotë se ka vrarë një militant të nivelit të lartë drejtues nga grupi i Xhihadit Islamik Palestinez, ndërsa numri i të vdekurve vazhdon të rritet nga sulmet ajrore në Gaza, por mes viktimave ka civilë, përfshirë të mitur.
Gjashtë fëmijë dhe disa luftëtarë të PIJ-së – përfshirë udhëheqësit Khaled Mansour dhe Tayseer Jabari – janë në mesin e 28 palestinezëve që kanë vdekur nga sulmet me raketa.
Ushtria izraelite paralajmëron se ky operacion i fundit – i koduar Breaking Dawn – mund të zgjasë për një javë.
Në ditën e dytë të dhunës, Izraeli vrau të shtunën udhëheqësin e lartë të PIJ-së Khaled Mansour në një sulm ajror në një shtëpi në Rafah, në jug të Gazës.
Komandanti i kishte mbijetuar më parë pesë tentativave për vrasje nga ushtria izraelite, e cila e akuzoi atë për planifikimin e operacioneve militante jashtë Gazës.
Vdekja e tij vjen pas një sulmi vdekjeprurës ajror izraelit kundër Tayseer Jabari, një tjetër komandant i lartë i PIJ, të premten.
Në Gaza, rreth 19 anëtarë të PIJ janë arrestuar në bastisjet në të gjithë Bregun Perëndimor të pushtuar, sipas Izraelit.
Sirenat paralajmëruese për raketat në hyrje vazhduan të bien në qytetet izraelite të shtunën, mes raporteve të tjera për sulme ajrore në Gaza.
Ministria e Shëndetësisë e Gazës fajësoi agresionin izraelit për vdekjen e palestinezëve dhe për 203 personat e plagosur.
Jeta në territorin palestinez është bërë shumë më e vështirë, pasi Izraeli mbylli vendkalimet me Gazën mes frikës se Xhihadi Islamik do të hakmerrej për arrestimin e një prej liderëve të tij në Bregun Perëndimor verior.
Të shtunën, termocentrali i vetëm i Gazës u mbyll sepse nuk kishte marrë asnjë dërgesë karburanti, tha një zëdhënës i kompanisë së energjisë elektrike.
/a.r
